Qaammaallassuaq Nuummiunit sisamanngornermi takuneqartoq

Nuup nalaani ullorissap anaata nakkariartornerani sisamanngornermi unnukkut qaammaallarujussuarnera Nuummiunit takuneqarpoq, qaammaallannera tungujuusattumik qalipaateqarpoq.
Assi © : Sergiu Bacioiu/Flickr Creative Commons
januaarip 04-at 2019 10:17

Ullorissap anaata nakkariartornera facebookimi allaaserineqaqattaarpoq -  videoliarineqarsimasorlu  saqqummiunneqarluni - soorlu aamma Air Greenlandimi pilotit ullorissap anaata nakkariartornera takusimagaat.

Pilotillu oqaluttuarnerat naapertorlugu takusaq kusanarlunilu tupinnarsimavoq.

Air Greenlandimi pilotiusup Mikael Jakobsenip Kangerlussuarmit Nuummukaartillutik ullorissap anaa nakkariartortoq takuaa. 

Qilak siullermik qaammaallappoq kingornalu tungujortunngorluni. Qaqqarsuillu tarrup ataaniittut qaammaallattoqarneratigut takuneqarsinnaalerlutik, ullorissallu anaata nakkariartornerani aseruatiternera takuneqarsinnaasimalluni. 

- Qaammaallannersuaq sekundit tallimat ingerlanerinnaani takuvarput - takusaralu puigunngisaannassavara, Air Greenlandimi piloteq, Mikael Jakobsen oqaluttuarpoq. 

Ullorissap anaa nakkariartortoq Sisimiut tikillugu takuneqarsinnaasimasoq inuit ilaasa oqaluttuaraat.