Video: Siumut Demokraatillu Inatsisartunit akerliullutik aninerat takuuk

Inatsisartut nutaat suliaqarnerisa ulluisa aappaanni ippassaq pisoqangaatsiarpoq.

Ataatsimiinneq aqqanermut aallartimmat Inatsisartut siulittaasuata, Hans Enoksenip Aningaasaqarnermut Akileraartarnermull ataatsimiititaliamut ilaasortassat aqqi taagorpai – ataatsimiititaliamullu Jens Napaattooq siulittaasussatut toqqarneqarpoq.

Taanna ataatsimiittarfimmi najuutinngilaq.

Siumup siulittaasunngortoq akerleralugu ataatsimiinneq unikkallartinniaraluarpaa – Hans Enoksenili ingerlatsiinnarluni ullormut oqaluuserisassanik attassiinnarpoq. Kim Kielsen (S) siulliulluni nikuippoq, pigisanilu tigoqqarlugit.

Parteeqataalu Vivian Motzfeldt aamma Erik Jensen kingunitsianngua nikuipput, tamatumalu kingorna Siumumeersut sinneri Demokraatillu pingasut inersuarmit aamma anipput.

Ilaqutariinni pisut Facebookikkut ingerlaartinneqartut

Pisoqarneranilu videoliaq Jens Napaattuumik, aappaanik meeraannillu angerlarsimaffianni sapaatip akunnerata naanerani pisoqarneranik takutitsisoq pissutaavoq.

Videoliami inuit pingasut inimiittut takutinneqarput. Taakkunannga marluk tassaapput Jens Napaattooq taassumalu inooqataa. Napaattuup inooqataa natermi nalavoq, Napaattuullu sequtserniarlugu siorasaarpaa.

Jens Napaattuup angerlarsimaffiani pisoqarnera sapaatip akunnerata naanerani illoqarfissioreernermi pisuuvoq.

AAMMA ATUARUK Jens Napãtôk Inatsisartunit sulinngiffeqarumasoq

Taassuma aappani nakuuserfigisimanagu KNR-imut ippassaq oqaatigaa.

Jens Napaattuup aappaa KNR-imit apersorneqarusunngilaq. Allakkatigulli oqaaseqarnermini nakuuserfigineqarsimanani oqaatigaa.

- Ilumoortorli tassaavoq ilaqutariinni imaannaanngitsumik atugaqartitsisumik ajornartorsiuteqaratta. Tamannalu ikiorneqarnissamik aqqutissiuuttaraluartoq sakkortugaluaqisumik aapparma nukappiaraaterput Livertippaa ajornartorsiuterput qanoq annertutigisoq takutillugu, allakkatigut oqaaseqarnermini oqarpoq.

Ilaqutariit katsorsartinniartut

Jens Napaattooq Inatsisartunit Avannaata Kommunianilu kommunalbestyrelsinit sulinngiffeqarnissaminik ippassaq qinnuteqarpoq.

Taassuma ilaquttanilu ilaqutariittut katsorsartinneq maanna aallartinniarlugu KNR-imut oqaatigaa.

Siumup pisoq politiinut unnerluutigaa, Naleqqallu siulittaasua, Hans Enoksen allamik iliuuseqarani suliaq politiinit isumagineqarnissaa utaqqiinnarniarpaa.

- Jens Napaattooq sulinngiffeqarnissamik qinnuteqarpoq. Taanna Inatsisartunut ilaasortanit, siusinnerusukkut sulinngiffeqarnissaminnik qinnuteqarsimasunit allaanerusumik iliuuseqarfigineqassanngilaq, Hans Enoksen oqarpoq.

- Suliaq politiinut unnerluutigineqarpoq, politiillu suliaqarnerat utaqqissavarput.