Video atorlugu killisiuisarnermut inatsit Folketingimi suliarileraat
Allannguuteqartitsinermi pinerluttulerinermik suliani politiit video atorlugu meeqqanik killisiuisinissamut periarfissaat ullumikkumut naleqqiullugu annertunerulersinneqassapput. Meeqqat 15-it inorlugit ukiullit, tassalu pillaatissinneqarsinnaanermut ukiut ammut killingat inorlugit ukiullit, matumani pineqarput.
Meeqqat eqqartuussivimmi eqqartuussisup tusarnaartullu saavani ilisimannittutut nassuiaasinneqarnermikkut sunnerneqarsinnaanerat ilaatigut taamaaliornikkut pinngitsoortinniarneqarpoq, tamatumunngalu peqatigitillugu meeqqat pinerliisuminnik eqqartuussivimmi naapitaqaqqinnissaat takusaqaqqinnissaallu aamma pinngitsoortinniarneqarpoq.
AAMMA ATUARUK Inatsisartut meeqqat illersorneqarnerulernissaat tapersersorpaat
Inatsimmut allannguutissami aamma kinguaassiutitigut pinerlunnernut, ilaqutarisanik atoqateqarnermut ilaqutariinniluunniit nakuusertoqarneranut tunngatillugu meeqqat 13-14-inik ukiullit killisiorneqartarnerisa tamatigut videoliarineqartarnissaat siunertaavoq.
Siunnersuut Nunatsinni sullissivinnut suliniaqatigiiffinnullu arlalinnut tusarniaassutigineqarsimavoq taakkunanngalu tapersersorneqarluarluni.
AAMMA ATUARUK Siunnersuutigineqartup inatsisitigut isumannaatsuuneq ajornerulersissavaa
Nunatsinnili eqqartuussissuserisut peqatigiiffiata meeqqat video atorlugu killisiorneqartarnerannut malittarisassat annertusarneqarnissaat eqqarsarnartoqartippaa. Peqatigiiffik ilaatigut isumaqarpoq meeqqat videoliaralugit killisiorneqarnerini uppernarsaatit eqqartuussinermi piffissami kingusinnerujussuakkut atugassat pisoqalisoorutigineqarsinnaasut. Taamaammat meeqqat eqqartuussinerup ingerlanneqarnerani nassuiaasussatut aggersaqqinneqarsinnaasariaqartut, peqatigiiffik tusarniaanermi akissuteqarluni taama allappoq.
Inatsisissatut siunnersuutip Folketingimi amerlanerussuteqartunit akuersissutigineqarluni ataatsimiititaliamut ingerlateqqinneqarnissaa naatsorsuutigineqarpoq.
