Siunnersuutigineqartup inatsisitigut isumannaatsuuneq ajornerulersissavaa
- Siunnersuuteqarnermi illersuineq pitsaavallaarunnaassaaq unnerluussaasorlu naammaginartumik
pillarneqanngitsoorsinnaalluni, illersuisoq Finn Meinel Sermitsiami ullumi saqqummersumi taama issuarneqarpoq.
Inatsisileritooq aviisimut nassuiaavoq, ukiut killiliussat qaffanneqarnerisigut ilisimannittut amerlissasut, taakkulu illersuisunit aperineqanngitsoorsinnaallutik.
AAMMA ATUARUK Inatsisartut meeqqat illersorneqarnerulernissaat tapersersorpaat
Tamannalu Finn Meinelip ajornartorsiutitaqarsoraa.
- Meeqqanik atornerluisimasut soorunami pillarneqartussaapput. Pisulli taamaattut sakkortusinnaasarmata unnerluutigineqartut eqqortumik illersorneqarnissaminnik pisussaaffeqartariaqarput, Finn Meinel Sermitsiamut taama oqarpoq, imalu itisiliilluni:
- Inuit unnerluutigineqarsimasut pinerluuteqarsimanngitsut inatsisitigut isumannaatsuunerup sakkukillinera pissutaalluni taava unnerluutigiuminarnerulissappat?
Siunnersuutip Inatsisartuni sapaatit-akunnerata siuliani siullermeerneqarnerani partiinit tamanit taperserneqartup inatsisitigut piareersarluarneqarsimasanissaanik aammalu pitsaanerusumik tusarniaassutigineqarnissaanik Finn Meinel ujartuivoq.