ICC: Issittumi killeqarfiit akimorlugit suleqatigiittariaqarpugut

Inuit Alaskameersut, Canadameersut, nunatsinneersut Ruslandimilu Tjukotkameersut Ottawami pingasunngornermi novembarip ulluisa arfineq pingajuanni ICC-ip peqataaffigisaani ataatsimeersuartitsisoqareersorlu taama nalunaaruteqartoqarpoq.

- Naggueqatigiit inuit akornatsinni kulturitsinnut atalluinnarmat tamanna pingaaruteqartorujussuuvoq, soorunami aamma nunami assigiinnik toqqammaveqarluta inuuniuteqarpugut, taamaattumik suleqatigiittariaqarneq eqqartorneqarlermat taanna pingaaruteqartorujussuuvoq, Kalaallit Nunaanni ICC-mi siulittaasoq, Hjalmar Dahl, Ottawami ataatsimeersuarnermi peqataaqqammersoq taama oqarpoq.

AAMMA ATUARUK Nunap inoqqaavisa Naalagaaffiit Peqatigiinni alaatsinaattunngornissaat kissaatigigaat

Suleqatigiittoqassaaq

Issittumi killeqarfiit akimorlugit suleqatigiinnissaq alloriarfigineqarsinnaanngussaaq.  Aappaagulu ataatsimeersuarnissaq  juulip 16-anniit 19-at ilanngullugu ingerlanneqassaaq.

- Isumaqarpunga pisuussutinik uumassusilinnik naggueqatigiit Inuit ulluni arlalinni oqaloqatigiillutik ataatsimeeqatigiinnerat imaannaanngitsuusoq. Siunissatsinnullu qiviarluta suli annerusumik suleqatigiinnissarput ataatsimeeqatigiinnermi qitiuvoq, taamaalillutalu aappaagu juulimi ICC-p ataatsimeersuarnissaani oqaloqatigeeqqinnissatsinnut pitsassuarnik toqqammavissaqaleratta nuannaarutigaara,  Hjalmar Dahl oqarpoq

AAMMA ATUARUK Uulia gassilu eqqasuuteqarnarput