AWG2016 AWG-mik aaqqissuisut piareersimanerarput apinerunissaali kissaatigalugu
- Piareersimavugut. Sulisut piareersimapput, namminerlu kajumissutsiminnik suleqataasussat piariivinnissaannut ulluni makkuni suliniarpugut, Arnakkuluk Jo Kleist, Artic Winter Games 2016-imi pisortamut tullersorti, taama oqarpoq.
Timersuutit assigiinngitsut 15-it unammissutigineqassapput, sulorarneq, basketballerneq, naggueqatigiit Inuit timersuutaat volleyballilu taakkununnga ilaallutik.
Naammattumilli aputeqarnissaa ernumassutigineqaraluartoq, Arnakkuluk Jo Kleist arfininngormat oqaloqatigigatsigu isumalluarpoq:
- Nuannaaqaagut assut ullaap tungaani takugatsigu taama apitigisoq. Assut qujanarpoq, aamma qujanartumik suleqateqaratta sullerissunik, tassa Sisorarfiit, kommunip sulisui, taavalu GNC aamma suleqatigalugit aput nuunneqarpoq piareersarneqarlunilu, sisorarfissallu aamma piareersarneqaannaavillutik. Nuanneqaaq apigaangat, Arnakkuluk Jo Kleist arfininngormat oqarpoq.
Nuummili sapaammi anorlernera pissutaalluni persingaatsiarpoq, aputaasallunilu. Apinissaalu taamaammat neriuutigaat:
- Suli apinerunissaa neriuutigaarput, aamma ullut tamaasa apilaarnissaa taamatut nuannissaqaaq taamaakkuni, kisianni neriulluarpugut taamatut aamma piareernissamut, Arnakkuluk Jo Kleist, Arctic Winter Games 2016-imi pisortamut tullersorti taama oqarpoq.
Timersortartut 1500-nit amerlanerusut Arctic Winter Gamesimi peqataassapput, inuillu katillugit 2000-it missaat Nuummut tikissallutik. Unammiuaarnerit marsip ulluisa arfernanni aallartissapput, aqqarnannilu naammassissallutik.
