Nunat Avannarliit Killiit Siunnersuisoqatigiiffiata inuusuttai ataatsimiilersut

Siunnersuisoqatigiiffiup inuusuttaata pilersinneqarnissaa siunnersuisoqatigiiffiup Savalimmiuni Islandimilu inuusuttunut immikkoortortaqarfiinit ukiuni marlunni sulissutigineqarpoq.

Inuusuttunullu siunnersuisoqatigiiffiliornissaq arlalinnik pissuteqartoq aaqqissuusseqataasoq, Morten Semre nassuiaavoq.

Ilaatigut nunani avannarlerni killerni inuusuttut imminerminut ilisimasakippallaarput.

- Arlalinnik ataatsimoorussaqaraluarluta immitsinnut ilisarisimavallaanngilagut, Morten Semre oqarpoq.

Aamma inuusuttut nunaminni inatsisartunut sunneeqataanissaminnut periarfissinneqarusupput.

- Inuusuttorpassuit politikkimut pakatsisarput. Nunat Avannarliit Killiit Siunnersuisoqatigiiffiata inuusuttaanik pilersitsinitsinni inuusuttut nunaminni inatsisartut, naalakkersuisut Nunallu Avannarliit Killiit Siunnersuisoqatigiiffiata sulinerannut sunniisinnaanissamut periarfissikkusuppagut, Morten Semre oqarpoq.

Aamma atuaruk Nunani avannarlerni efterskoleqalernissaa sulissutigineqartoq

Tamatuma saniatigut inuusuttorpassuit Nunani Avannarlerni Killernit nuuttarput. Ajornartorsiuterujussuarlu taanna inuusuttut aaqqiivigeqataassagaat, Morten Semre isumaqarpoq.

- Inuusuttut nuuttarnerat nunap ilaata unammilligassarinerpaasai ilaanniippoq. Inuusuttullu namminneq ajornartorsiummut aaqqiiviginninnissamut suleqataanerusariaqartut isumaqarpugut, Morten Semre oqarpoq.

Nunani Avannarlerni Killerni inuusuttunut unammilligassat ataatsimoorussat pillugit ukiumoortumik ataatsimiinnissamut nunat peqataatitaqartussat tamarmik sisamanik aallartitaqartarnissaat pilersaarutigineqarpoq.

Nunat Avannarliit Killiit inuusuttunit ajunnginnerusumik najugaqarfiginissaat pillugu inuusuttut ataatsimeereerunik innersuussuussuteqarnissaat aamma pilersaarutigineqarpoq.

Nunatsinnit ataatsimeeqataasut sisamat Siumup, Atassutip, Demokraatit Inuit Ataqatigiillu inuusuttaanni ilaasortaapput.