Nunani avannarlerni efterskoleqalernissaa sulissutigineqartoq
Nunani avannarlerni killerni, ilaatigut Nunatsinni, Savalimmiuni Islandimilu, 14-iniit 17-inut ukiulinnut efterskoleliornissamik pilersaarutip nanginneqarnissaa taakkua innersuuppaat.
- Atuarfinnik, inuusuttut nunani avannarlerni killerni taakkunanilu inuiaqatigiinni inuunermik ilisimmaatiginerullugu perorfigisassaannik, pilersitsinissaq Nunat Avannarliit Killiit Siunnersuisoqatigiivisa pingaartippaat. Taavalu aamma inuusuttut inuttut, oqaatsitsigut piorsarsimassutsikkullu ilisimasareqatigiilernissaat anguniagaavoq, siunnersuisoqatigiit allapput.
Ukiumoortumik ataatsimiinnermi, Qaqortumi pisumi, marlunnik aamma oqaaseqaateqarput.
Siullermik immap uumasuini plastikip seqummaanik mikisuaqqanik atlantikullu avannarpasissuata imartaani plastikkinik mingutsisinerup siaruaakkiartornera misissuinerit aallartisarneqaqqullugit nunat avannarlerni killerni Naalakkersuisut inassuteqarfigineqarput.
Taavalu nunanut allanut tunngasunut ministerit suliniaqatigiinnik, nunani taakkunani suleqatigiinnissamut isumaqatigiissusiortussanik, pilersitsisimammata qujaffigaat.
- Nunat avannarliit killiit issittumi inissinnissaq eqqarsaatigalugu tapersersoqatigiinnerusariaqarput. Kisimiitilluta inuiannguuvut ataatsimooruttali nunarsuup ilagissavaatigut nukittuut, siulittaasunngortoq Islandermioq Unnur Brå Konráðsdóttir oqarpoq.