Vestager atorfimmut qaffasissumut piukkoorluni EU-mi kommissæritut atuuffimminit sulinngikkallalertoq
EU-mi kommissæri Margrethe Vestager, Danmarkimeersoq, atorfimmut qaffasissumut maanna piukkoorpoq.
Margrethe Vestagerimi Europap aningaaserivissuani, Den Europæiske Investeringsbankimi (EIB), siulittaasussatut piukkoorpoq, EU-milu kommissæritut atuuffimminit sulinngikkallalerluni.
Vestager attaveqaqatigiittarfikkut X-ikkut, Twitteritut siornatigut ilisimaneqartukkut, nammineq marlunngornermi unnukkut taama uppernarsaavoq.
EIB-mi siulittaasussatut piukkoortut arlaliupput, Spaniap aningaasaqarnermut ministeria Nadia Calviño siulittaasussatut piukkoortut akornanni unammillernarnerpaatut nalilerneqarluni.
EIB-mi guvernørit 27-t, EU-mi nunat aningaasaqarnermut ministeriinik septembarip ulluisa 15-ianni 16-iannilu ataatsimeeqateqarnerminni EIB-p siulittaasussaa nutaaq nassaariniarsarissavaat. Kingusinnerusukkulli aamma aalajangiisoqarataannaavoq.
Margrethe Vestager, EU-Kommissionip siulittaasup tulliatut 2019-imili issiavoq, Europap qarasaasiaqarnikkut unammilleqatigiinnikkullu siunissami piareersimanissaanik tassani akisussaaffeqarluni.