Assi: KNR

Venstrep naalakkersuisuutitaqarnerata ukiua siulleq isorineqartoq

Siumup Inuit Ataqatigiillu Folketingimi ilaasortaatitaata danskit naalakkersuisuisa kusanartunik siunertaqaraluarlutik Danmarkip Nunatsinni oqartussaaffigisaanut tunngatillugu iliuuseqanngippallaarnerarlugit isornartorsiorpaat. Løkke isornartorsiorneqarnini pillugu oqassaanngilaq.

Venstrep naalakkersuisuutitaqarnerata ukiua siulleq Nunatsinnut pissarsiaqarfiuvallaanngilaq,  naak danskit naalakkersuisuisa Naalagaaffeqatigiinneq pingaartitaralugu pappilissatigut oqaatigigaluaraat.

Aleqa Hammond Folketingimi pingasunngormat unnukkut naggataarutaasumik oqallinnermi taama isornartorsiuivoq.

- Danmarkimi Naalakkersuisooqatigiikkumalluni isumaqatigiissummi Naalagaaffeqatigiinneq immikkut immikkoortortalerneqarluni pingaartinneqarpoq. Oqaluttarfimmit aqatsaat taama Naalagaaffeqatigiinnerup Kunngeqarfiullu qanoq pingaartigineranik ministeriuneq oqaaseqaqattaartigaaq. Taamaakkaluartoq danskinit naalakkersuisuusunit nunatsinnut attuumassuteqartunik aalajangiinialernerminni nunarput akuutinnagu aammalu isumasioqqaarnagu aalajangiiniartarnertik attatiinnarpaat, kingullertigut soorlu politeeqarneq pillugu isumaqatigiissusiornermi aammalu aningaasanut inatsimmut isumaqatiginninniarnermut aggersaanatik, Aleqa Hammond ilaatigut taama isornartorsiuivoq.

Hammond isumaqarpoq danskit naalakkersuisui Nunatsinni danskit akisussaaffigisaat iliuuseqarfiginagit immikkut ilisimasallit ukioq siulleq tusaaniarnerusimagaat.

- Ulloq manna takillugu nalunaarusiat naammassinissaat utaqqiluttortitsisuupput taakkuuppullugooq nunatsinnut susoqarnissaanut tikkuussisussat. Pitsanngorsaatissat erseqqissut takorusunnaqaat, pilersaarutinik piviusunngortitassat takorusunnaqaat, aningaasanut inatsisissamut siunnersuusiornermi isumaqatigiinniarnermut qaaqqusissutit takorusunnaqaat sulinermilu akuutinneqarneq takorusunnaqaaq.

Aamma atuaruk Søren Pind: Kalaallit Nunaanni politiit nukittorsarneqarumaarput

Inatsisilerinermik suleqatigiinnermut ilaannginneq, upalungaarsimaniarneq, immap assingi…

Danskit naalakkersuisuisa Nunatsinni eqqartuussiveqarnermi pissutsinik pitsanngorsaasimannginnerat, politiit kommunefogedillu atugarisaannik pitsanngorsaasimannginnerat aammalu Issittumi upalungaarsimaniarnermik nukittorsaasimannginnerat Aleqa Hammondip Aaja Chemnitz Larsenillu isornartorsiorpaat.

Danskit naalagaaffiata Nunatsinni oqartussaaffigisai Danmarkimi pissutsinut sanillersuunneqarsinnaasunngorlugit pitsanngorsarneqassasut naalakkersuisoqatigiinnissamik isumaqatigiissummi allassimagaluartoq taama inissisimasoqarpoq.

Pituffik aamma eqqaaneqarpoq. Kiffartuussinissamik nutaamik isumaqatigiissuteqartoqarpat, tamatuma nunatta karsianit aalajangersimasumik isertitaqarfiunissaa aammalu Nunatsinni innuttaasunut suliffissanik ilinniartullu sungiusarfissaannik pissarsiaqataanissaa Folketingimut ilaasortat nunatsinneersut piumasaraat.

Aamma atuaruk Politikerit: Nunap assingi pillugit Danmarkimut isumaqatigiissut nutarterneqassanngilaq

Aamma atuaruk Pituffik USA-mut nutaamik illersornissamut isumaqatigiissuteqartoqassanngilaq

IA: Ukioq aamma pitsaasunik angusaqarfiuvoq

Aaja Chemnitz Larsen oqalugiarami sallaannerulaarpoq. Taanna isumaqarpoq Inuit Ataqatigiit Folketingimi sulinerminni danskit naalakkersuisuinik suleqarnerminni siorna aasakkut qinersisoqarnerata kingorna arlalinnik angusaqarsimasut.

- Kalaallit isaannit isigalugu kingumut qiviariarfigisassagut ajunngitsutut nalilersinnaasagut ikinngeqaat.

Assersuutigalugit innuttaasut nalunaarsorneqartarnerat pillugu inatsisip aamma meeqqat pillugit inatsisip nutarteriffigineqarnerat, taakkumi Danmarkimi inatsisinut naleqqiullugit equngasortaqarmata.

Danmarkilli Nunatsinnut tunngatillugu pisussaaffimminik tamakkiisumik naammassinninnissaanut aqqut suli takisoq, Inuit Ataqatigiinnit erseqqissaatigineqarpoq.

- Taamatut immikkoortitsisoqartarnera tamaanga killeqartariaqalerpoq, tassami danskit naalakkersuisuisa danskit inatsisaat nutaat atuutilerfii toqqammavigalugit nunatsinni kajaallaasitat atuutilersinneqartarnerat tuavisaarunnerusalertariaqaramikkit, Aaja Chemnitz Larsen taama oqarpoq.

Lars Løkke Rasmussenili (V) isornartorsiuisoqarneranut oqaaseqarpallaanngilaq, naalagaaffeqatigiilli pillugit Folketingimi ukiumoortumik oqallinneq sapaatit-akunneri marluk matuma siorna ingerlanneqartoq innersuussutigaa, tassani aamma taamatuffaarik isornartorsiuisoqarmat - Løkkellu naalakkersuisooqatigiinnissamik isumaqatigiissummi Naalagaaffeqatigiinnerup allaaserineqarnera taamani innersuussutigaa.

Naalagaaffeqatigiinnermi pissutsit soqutigineqarnerat nuannaarutigalugu ministeriunerup oqaatigaa, Illersornissaqarfiullu Issittumi suliassai pillugit nalunaarusiaq kinguaattoorutigineqangaatsiartoq qaammammi uani saqqummersinneqassasoq neriorsuutigalugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat