Folketingimut qinersineq 2015 Venstre: Naalagaaffeqatigiinni killeqarfitsigut aporfiusut ikilisinneqassapput

Naalagaaffeqatigiinni killeqarfitsigut aporfiusinnaasut annikillisarniarlugit Venstrep neriorsuutigaa. Folketingimut qinersinissap ulluani taama neriorsuuteqartoqarpoq.

Venstrep Nunat avannarliit Siunnersuisooqatigiffianni ilaasortaatitaa, Berthel Haarder, tusagassiorfinnut nalunaaruteqarluni allappoq killeqarfitsigut aporfiusinnaasut piiarnissaat qulakkeerniarlugu qinersinerup kingorna nammineerluni sulissuteqarniarluni.

- Iliuuseqarnissamut piffissanngorpoq. Ministereqarfinni politikkikkut piumassuseqartoqannginnera aporfiuvoq. Qinersinerup kingorna ministerit kalaallit savalimmiormiullu piumasaqaataannut qisuariaateqanngitsut ornillugit oqaloqatiginiarpakka. Pisariaqassappat aamma nunani avannarlerni allaniittut, Bertel Haarder taama oqarpoq.

Naalagaaffeqatigiinni nunamit nunamut nuunnermi ajornartorsiutit pilersartut qanoq iliuuseqarfiginissaannut danskit Folketingiat 2014-imi upernaakkut imminnut pisussaaffilerput. Tamatumani ilaatigut pineqarlutik kørekortit akuersissutigineqartarnerat, innuttaasut innarluutillit ikiorserneqartarnerat, Danmarkimi NemID-mik atuineq aammalu Savalimmiormiut ullumi CPR-normoqanngitsut CPR-normumik tunineqartalernissaat.

Suliaq Nunat avannarliit Siunnersuisooqatigiiffianni qaqinneqarsimavoq, Nunani avannarlerni nunat akornanni aporfiusinnaasut maanna qulaajaaffigineqarlutik. Savalimmiormiulli kalaallillu folketingimut ilaasortaatitaat aammalu Peqatigiiffik Naalagaaffeqatigiit suliap sukkanerusumik ingerlanneqarnissaa pillugu kimigiisersimapput.

Tamannalu qinersinerup kingorna isumagineqassasoq Venstre maanna neriorsuivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat