Vance: Trumpip Iranip atomimik sakkussiaqalernissaanut periarfissai nungutinniarai

Iranimut saassussineq Iranip atomimik sakkussiaqalinnginnissaanut periarfissatuaammat, Donald Trumpip akueraa.

USA-mi præsidentip tullia J.D. Vance, CNN-ip paasissutissiinera naapertorlugu, Fox Newsimit apersorneqarluni taama oqarpoq.

- Trumpip USA "præsidentitut aappassaarluni atorfeqarnermini Iranip atomimik sakkussiaqalernissaanut ukiuni pingasuni sisamaniluunniit taamaallaat isumannaatsuutinniarsarinngilaa", Vance oqarpoq.

- Iranip atomimik sakkussiaqalinngisaannarnissaa qulakkeerniarpaa, tamannalu anguniarlugu Iranimi naalakkersuisut eqqarsartaasiat allanngortilluinnarneqartariaqarpoq.

- Iranimi naalakkersuisut sanngiilleqqasut takuaa. Atomimik sakkussiorusulluinnarnerat nalunngilaa, nunalu isumannaatsuusariaqarmat iliuuseqarnissani aalajangiuppaa, Vance CNN-ip paasissutissiinera naapertorlugu oqarpoq.

USA-p Israelillu Iran arfininngornermi ullaakkut ikioqatigiillutik saassuterujussuarpaat. Nunap qullersaa, Ayatollah Ali Khamenei, saassussinerni toqutaasut ilagaat.

Iranip missilit dronellu akiniutitut atorlugit Amerikamiut nunani Kangiani Qiterlermiittuni arlalinni susassaqarfii arlallit saassuppai.

Qaammatialuit qaangiutinnginneranni

Israelimi ministeriuneq Benjamin Netanyahu, nutaarsiassaqartitsiviup AFP-ip nutaarsiassiinera naapertorlugu oqarpoq, Irani atomimik sakkussiassanik sanaartorfissanik nutaanik sanaartorsimammat kingusinaartinnani saassussisoqartariaqarsimasoq.

- Sumiiffinni nutaani sanaartuleramik, nunap iluani toqqorsivinnik nutaanik, taamaalillutik missilinut tunngatillugu suliaat atomimillu sakkussialiorniarnerminni pilersaarutaat qaammatialuit qaangiutinnginneranni suneqarsinnaajunnaartussanngorlutik, Netanyahu AFP-ip nutaarsiassiinera naapertorlugu oqarpoq.

- Piaartumik iliuuseqartoqanngippat siunissami aamma iliuuseqartoqarsinnaajunnaassagami, taanna ilassutigalugu oqarpoq.

USA-p nunani Kangiani Qiterlermiittuni sivisuumik sorsunnissani pilersaarutiginngikkaa, Amerikap præsidentiata tullersortaata, Fox Newsimit apersorneqarnermini oqaatigeqqippaa.  

- Donald Trumpip nunatta ukiuni arlalinni akerleriinnermut sivisusinnaasumut siunertaqanngitsumullu peqataanissaa akuerinavianngilaa, Vance CNN naapertorlugu oqarpoq.

- Irakimi Afghanistanimilu ajornartorsiutigisatsitut ajornartorsiuteqaqqissanngilagut, Vance nangippoq, Irakimilu Afghanistanimilu sorsunnerit sivisoqisut USA-p akuliuffigisimalluinnagai innersuussutigalugit.

Vance oqarpoq, nunap qullersaata toqutaanerata kingorna Iranimi naalakkersuisut qanoq pineqarnissaat "præsidentip pingaarnertut anguniagaanut apeqqutaanngitsoq“. Iranip atomimik sakkussiaqalernissaanik pinaveersaartitsineq pingaarnertut siunertarineqartoq, oqarpoq.

/ritzau/