Ikiuiniaqatigiiffiup Iranimi inuit 555-it toqutaasimanerarai
USA-p Israelillu Iran saassummassuk inuit ikinnerpaamik 555-it toqutaapput.
Nutaarsiassaqartitsivik AFP-ip nutaarsiassiinera naapertorlugu, Iranimi 'Røde Halvmåne' ataasinngornermi ullaakkut taama nalunaarpoq. 'Røde Halvmåne' peqatigiiffiuvoq Røde Korsimut tapersersueqataasoq.
Kisitsisit taakku allanit uppernarsarneqarsimanngillat.
USA-p Israelillu Iranimi sakkutuulersornerat arfininngornermi ullaakkut aallartittoq annertuvoq.
'Røde Halvmåne'-p illoqarfiit 131-t nunallu immikkoortui arlallit saassussinermit sunnerneqarsimasut Telegramimi allassimavaa.
Iranip qullersaa, Ayatollah Ali Khamenei, saassussinerni toqutaavoq.
Akiuunneq unitsinneqarnavianngitsoq
USA-p præsidentia Donald Trump sakkutooqarnikkut akuliunnikkut Iranip atomimik sakkussiaqalinnginnissaanik qulakkeerinninnissaq siunertaasoq oqarpoq.
Trump Israelimilu ministeriuneq Benjamin Netanyahu saassussineq maannakkut ingerlanneqartoq Iranimi naalakkersuisut allanngornissaannut aqqutissiuisinnaasoq oqarput.
Trump apersorneqarnermini USA-p Israelillu saassussinerat sapaatit-akunneri sisamat sinnerlugit sivisussuseqarsinnaasoq, sapaammi tusagassiuutinut arlalinnut oqarpoq.
- Anguniakkatta tamaasa angunissaata tungaanut akiuunneq unitsinneqarnavianngilaq, videomi Truth Socialimi ikkunneqartumi sapaammi unnukkut oqarpoq.
USA-p sakkutuui pingasut toqutaasimasut sapaatiummat uppernarsarneqarpoq. Kuwaitimi sakkutooqarfimmi pisimasoq, isumannaallisaanermut tunngasunik ilisimasallit marluk kinaassutsiminnik isertuussisut nutaarsiassaqartitsivimmut Reutersimut oqarput.
/ritzau/
