Uummammut aallartitsiniuteqarnissaq timersortarfiup akisussaaffigaa
Peqqissutsimut Naalakkersuisoq Agathe Fontain, Inatsisartunut ilaasortamut Astrid Fleischer Rex-imut, §37 atorlugu apeqquteqaateqarsimasumut taama akissuteqarpoq.
Peqqissutsimut Naalakkersuisup uummammik aallartitsiniutit sumiiffinnut inunnit amerlasuunit ornigarneqartartunut inissinneqarnissaat isumassarsiatsialaanerarpaa, taamaattorli tamanna politikkikkut akisussaaffigineqanngitsoq isumaqarluni.
Astrid Fleischer Rex-ip ilanngullugu apeqquteqaatigaa ambulancit tamarmik uummammik aallartitsiniutinik siunissami atortulersorneqassanersut.
Agathe Fontain akissummini allappoq, Naalakkersuisut pilersaaruteqartut peqqinnissaqarfiup immikkoortui tamarmik uummammik puannillu ajutoortoqartillugu annaassiniarsinnaanissamik saniatigut aamma innaallagiaq atorlugu uummammik aallartitsiniarsinnaassasut.
Tamannalu pisinnaasoq peqqinnissaqarfinni, ullumikkut tamakkuninnga peqarfiunngitsuni, uummammik aallartitsiniutinik angallattakkanik atortulersuinikkut.