Oqartussat eqqarsaqqeqqusisut: Uumasut naalliutsillugit immiussat siammartikkat politiinut nalunaarutigaavut
- Uumasunik naalliutsitsineq pillugu suliaq eqqartuussivimmut suliassanngortissanersoq unnerluussisussaatitaasut aalajangissavaat.
Avannaani uumasunut nakorsaaneq, Pernille Østergaard, taama oqarpoq.
Uumasut naalliutsillugit immiussat inuit attaveqatigiittarfiini siammarterneqarsimasut Uumasunut Nakorsaqarfik Inuussutissalerinermillu Oqartussaqarfik ilisimannilereersorlu taanna taama oqarpoq. Uumasut naalliutsillugit immiussat marluk taakku Facebookimi siammarterneqarsimallutik takussaapput.
Immiussat taakku marluk piffissami kingullermili takussaapput.
Puisi naaleqattaarlugu naalliutsiunneqartoq immiussami siullermi erserpoq, terianniararlu allunaasamik pitutserlugu naalliutsinneqartoq immiussap aappaani erserpoq.
Politiinut nalunaarutigigaat
Uumasunik naalliutsitsineq inatsisinik unioqqutitsinerulluinnartuusoq pineqaatissinneqaataasinnaasorlu, uumasunut nakorsaaneq oqarpoq.
Immiussat taakku marluk Uumasunut Nakorsaqarfik Inuussutissalerinermullu Oqartussaaffiup politiinut nalunaarutigigai, taanna ilisimatitsivoq. Taakku inunnit immiussat taakku pillugit attavigineqareernerminni taamaaliorput.
Uumasut piaraanillu avissaartitsisoqaqqusaanngilluinnartoq, Aalisarnermut Piniarnermullu Naalakkersuisoqarfik erseqqissaavoq.
Terianniat maajip 15-iata septembarillu 15-iata akornanni aamma eqqissisimatitaasussaapput.
Naalakkersuisoqarfik uumasut naalliutsillugit immiussanik inuit attaveqatigiittarfiini siammarterinnginnissamik kaammattuuteqarpoq.
