Uumasunut nakorsat nunaqarfiliartartuugallartussat: Kukiiaaginnartassanngilagut

Københavns Universitetip QimmeqHealthimik taallugu ilisimatusarnermik paasissutissiinermillu suliniutaa uumasunut nunatsinni qimuttunik qimmeqarfiusuni nakorsassaaleqinerujussuarmut iluarsiissutaassapput.

Uumasunummi nakorsat qulingiluat nammineq piumassuseq tunngavigilluinnarlugu Sisimiuni Ilulissanilu uumasunik marsip qiteqqunnerata maajillu qiteqqunnerata akornanni nakorsiussisarfiugallartussanik pilersitsiniarput.

- Uumasunut nakorsat taakku akissarsiaqaatiginagu taamaaliorniarput. Namminneq piumassuseq tunngavigalugu feeriarnerminni sulissapput, uumasunut nakorsaq Københavns Universitetimilu lektori Rikke Langebæk oqarpoq.

Taanna uumasunut nakorsaqatinilu nunatsinni qimmit qimuttut peqqissusaannik misissuiniarlutik QimmeqHealthimik suliniuteqartuupput.

Taanna ilaqutariillu uumasuutiminnik nakorsiuussisarfianni ilisimatusarfiutigisumi, Universitetshospitalet for Familiedyrimi, nakorsaanerusoq, Emilie Andersen-Ranberg, suleqatigiipput.

- Kukiiaaginnartassanngilagut. Uumasunik aamma pilattaasassallutalu nakorsaatitortitsisassaagut, Emilie Andersen-Ranberg oqarpoq.

Uumasunut nakorsat nunaqarfinni aamma amigaataaqaat. Nunatsinnimi tamarmi ataasiinnarmik Nuummiittumik inuinnarmillu pigineqartumik uumasunik nakorsiussisarfeqarpoq, qimminillu qimuttunik tassunga nakorsiussisoqaqqusaanani.

AAMMA ATUARUK Uumasut nakorsassaaleqineq qimminut tuppoq: Naalakkersuisup telemedicin aaqqiissutiginiarpaa

Iluliarmiu Avannaata Kommuniata kommunalbestyrelsiani ilaasortaq Inuit Ataqatigiinneersoq qimuttunillu qimmiutilik, Niels Davidsen, siusinnerusukkut allaatigisatsinni ilanngupparput. Ilulissani uumasunut nakorsaqanngimmat taassuma qimmiutimi ilaat napparsimanerani toqusoq isigiinnartariaqarsimavaa.

- Soorunami qimmigut paarilluartarpagut. Napparsimaleraangatali nakorsiussinnaasanngilagut, nakorteqqinnissaalli neriuutigiinnartariaqartarpagut, nakorteqqinngikkaangatalu toqusut isigiinnartariaqartarpagut, Niels Davidsen oqarpoq.

Nunatsinnilu sulitillutik namminneq taamatut aamma siumugaqarsimallutik, Rikke Langebæk Emilie Andersen-Ranbergilu oqarput.

Qimmit qimuttut peqqissusaat

Nunatsinni qimmit qimuttut ukiuni 20-ni kingullerni affaannanngorlutik maanna 13.000-t missaannaanniittut, Emilie Andersen-Ranberg oqarpoq.

Tamanna nunaqarfiit inuisa noorarnerannik ingammilli aamma qimminik qimuttunik napparsimasunik nakorsaasinnaasunik uumasunut nakorsassaalatsisoqarneranik peqquteqarpoq. Tamanna qimminik qimuttunik atueriaatsit qimusserlunilu piniariaatsit silap pissusiata allanngoriartornerani allanngoriartornerannik aallaaveqarpoq.

- Qimuttunik qimmeqarfinni uumasunut nakorsaqalerpat qimmit napparsimasut toqunneqartariaarullutik nakorsarneqarsinnaalissapput. Tamanna qimmit qimuttut massakkornit uumanertunerulernerannik kinguneqassaaq, Emilie Andersen-Ranberg nassuiaavoq.

Canada Alaskalu uumasunik nakorsiaassisarfiugallartussanik pilersitsinermik misilittagaqarfiupput, nunallu taakku nunatsinni qimminut qimuttunut assingusunik qimuttunik aamma qimmeqarfeqarput. Taakkunanilu qimmit qimuttut uumasunik nakorsiaassisarfiugallartussanik pilersitsisoqareernerani uumanertunerulerlutillu nappaalavallaarunnaarput.

Uumasunut nakorsat Danmarkimeersut nunatsinniinnerminni qimmit qimuttut sualummik kigutaat misissoqqissaarlugillu isumagisassavaat.

Uumasunimmi nakorsiaassisarfiit aningaasaateqarfinnit assigiinngitsunit, ingammik Per Henriksen-fondenimit, ilaatigut uumasut kigutaasa mannguinik nutaaliamik qinnguartaatisinermi tapiiffgineqarput.

Qinnguartaat taanna uumasunut nakorsat nunatsinniit angerlarunik nassassangimmassuk, qimuttunik qimmeqarfimmiiginnassaaq.

- Qinnguartaat taanna umasunut nakorsanut allanut Kalaallit Nunaanniittunut atoriaannaajumaarpoq, Rikke Langebæk oqarpoq.

Rikke Langebæk Emilie Andersen-Ranbergilu uumasunik pilattaaginnarnatillu akiuussusersuiinnassanngillat. Taakkumi aamma kajumilertitsiartorniarput.

Kajumilertitsiartorniartut

Uumasunut nakorsat Danmarkimeersut taakku siunissami qaninnerusumi ungasinnerusumilu pisussatut pilersaarutaat marluupput.

- Qimminik qimuttunik sapinngisamik amerlanerpaanik nakorsaarusukkatta uumasunik nakorsiussisarfiugallartussanik pilersitsisussaanerput qimuttunik qimmiutilinnut sapinngisamik amerlanerpaanut ilisimatitsissutigineqartariaqarpoq. Meeqqanut inuusuttunullu oqalugiartorluta aamma atuarfinniittassaagut. Ingammillu Sisimiuni HTX-liarusuppugut, tassanimi inuusuttut ilaat uumasunut nakorsatut Københavnimi ilinniarnissamut kajumilerataannaammata, Rikke Langebæk oqarpoq.

AAMMA ATUARUK Slædehundeførerforeninger: Hunde aflives på grund af mangel på dyrlæge

QimmeqHealthimik taallugu suliniutillit nunaqarfinnut saqqummiinertalimmik oqalugiartorlutik qimuttunik qimmeqarfinniittareerput. Taakkulu qimmit peqqissuuinnarnissaannut qanoq paaqqinnittoqarsinnaaneranik nunaqarfinni qimuttunik qimmiutilinnut ilitsersuipput.

Inuusuttattalu uumasunut nakorsanngorniarusuttortaqarnissaat kulturikkut kingornussatsinnik tammatsaaliinermut pingaaruteqartoq, ilinniarnertuunngornianut erseqqissaatiginiarpaat.

- Qimmimmi qimuttut ikiliartuinnarmata tamanna qaammarsaatigineqarnerusariaqarpoq. Uumasunut nakorsat sulerisarnerannik sulerisinnaanerannillu oqaluttuukkusuppavut, Rikke Langebæk oqarpoq.

Politikkikkut iliortoqartariaqartoq

Rikke Langebæk Emilie Andersen-Ranbergilu taavalu Naalakkersuisut uumasunullu nakorsaanerit uumasunik qarasaasiakkut, telemedicinikkut, nakorsiartitsinermik misileraanermi suleqatigiipput.

Tassa qimuttunik qimmiutillit uumasunut nakorsamut soorlu Nuummiittumut sianerlutik qimmitik takutittarpaat.

- Tassa nunaqarfimmiut taamaalillutik uumasunut nakorsamut ungasianiit ikiuuttussamut assinik qarasaasiakkut nassiussisarput. Namminersorlutik Oqartussat uumasunullu nakorsaanerit tamanna iluarisimaarluinnarlugulu atuutilivinniarsarileruttorpaat. Uumasunillu nakorsiussisarfiugallartussanik pilersitsisoqarniarnera aamma tapersersorluinnarpaat, Rikke Langebæk oqarpoq.

AAMMA ATUARUK Ingen vil være slædehundenes dyrlæge i Ilulissat

Uumasunulli nakorsat tapersersorneqarluarnertik qujaruppaat, politikkikkulli iliortoqartariaqartoq aamma isumaqarput.

- Tunngaviatiguinnaq tapersersorneqarnera unamminarnerpaavoq. Namminersorlutik Oqartussammi uumasunut nakorsaqarnerulernissaanik qulakkeerutaasinnaasunik aningaaliinikuunngillat, taamaammat aningaasaliisinnaanngoqqullugit politikkikkut iliortoqartariaqarpoq, Rikke Langebæk oqarpoq nangillunilu:

- Qimuttunimmi qimmeqarneq pisariikkunnaarnikuuvoq. Akisuvoq. Aningaasaateqarfinnut assigiinngitsunut qinnuteqariaannaajuaannarpugut, tamaaliortuaannarsinnaanatali.

Naalakkersuisut uumasunik qarasaasiakkut nakorsiaassisarnermik misileraaniartut, Aalisarnermut Piniarnermullu Naalakkersuisoq Siumumeersoq Karl Tobiassen siusinnerusukkut oqaloqatigigatsigu oqarpoq.

Rikke Langebækip Emilie Andersen-Ranbergillu qimuttunik qimmiutillit qimmiutimik ilaannik nakorsiaasserusuttut tamarmik attaveqaqquaat. Aamma atuarfeqarfiit ilinniarfeqarfiillu uumasunut nakorsamik oqalugiartussamik pulaartoqarusuttunit aamma attavigeqqupput.