Uuliasiortut Aasiaat isuanut innersuuppaat
Uuliasiortut nunami atortuusivittut atugassat siullermik kissaatigineqartumit illoqarfiup illuatungaaniippoq. Ikerasannguami nunaminertangaatsiarsuaq uuliasiortut nunami sullivissaattut immikkoortinneqarpoq.
2011-mi Cairnip misileraalluni Qeqertarsuup kitaani qillerinerani paasinarsivoq nunami peqqumaasivilersornermi nunaminertanik annertoorujussuarnik pisariaqartitsisoqartoq. Misileraalluni qillerinerup nalaani Aasiaat umiarsualiviat ulikkaavillugu immneqarpoq.
Suliffeqarfissuit soorlu Arctic Base Supply qinnuteqaraluarput mittarfiup ungasinngisaani nunaminertaq atorusullugu. Tamannali atugassanngortinneqarsinnaanngilaq mittarfik tallineqassappat nuna tamanna atorneqartussaammat. Aamma aalisakkeriviup eqqaa pileritsaanneqaraluarpoq tamannali pissappat pisuussutit uumassusillit aamma uumaatsut atugaaneri imminnut akornusersuutilersinnaapput.
Taamaammat Qaasuitsup Kommunia aalajangerpoq nunaminertami uuliasiortut sullivigisinnaasaannik allamik nassaarniarluni.
- Toqqaannartumik qinnuteqaateqartoqanngikkaluarpoq. Kisianni nunaminertamik immikkoortitsivugut ilisimagatsigu misileraalluni uuliasiorneq aallarteqqippat pisariaqartitsineq annertusussaasoq, Qaasuitsup Kommuniani borgmesteri Jess Svane KNR-mut oqarpoq.
Nunaminertamilli atuiniartut piumasaqaatit aalajangersimasut naammassisimasariaqarpaat.
- Sukumiisumik nassuiarneqartussaavoq nunaminertap sumut atorniarnera, atortullu suut ikkussorneqartussaanersut. Suliffeqarfiup aamma uppernarsarsinnaasariaqarpaa avatangiisinik mianerittussaanini, Jess Svane oqarpoq.
Ikerasannguaq qeqertap Tupilaap akinnguaniippoq. Qaasuitsup Kommuniata suli periarfissatut eqqarsaatersuutigaa ikaartarfiliorsinnaaneq nunaminertanik annertunerusunik pisariaqartitsisoqassappat.
- Aasianniinnaq uuliasiortut sullivigisinnaasaannik nunaminertanik immikkoortitsisoqanngilaq. Tamanna illoqarfinni nunaqarfinnilu arlalinni pivoq, Jess Svane erseqqissaavoq.