Uuliasiortitseqatigiiffiit Kalaallit Nunaannit qimarrapput
Nukissiuuteqarfiit angisuut pingasut tassaasut Norgimeersoq Statoil, Frankrigimeersoq GDF Suez, qallunaallu nunaanneersoq Dong Energy, nunatsinni uuliamik nassaarnissartik nalornisigalugu misissuinissamut akuersissutit uterteqqikkaat, aviisi Politiken taama allaaserisaqarpoq.
Ingerlatsiviit arlallit, soorlu Shell, Mærsk aamma Skotlandimeersut Cairn Energy, uuliasiornermut qillerinissap akisuallaarnera patsisigalugu kiisalu eqqarsaatersuutigeqqaarniarlugu uuliasiornissamut iliuusissartik ukiut marlunnik kinguartippaat.
Nunatsinnilu misissueqqinnissaq GDF Suezimut takorlooruminaappoq.
- Anersamik oqartoqanngisaannassaaq. Niuerfilli nalorninartorsiorfiutillugu, Kalaallit Nunaannilu ataqatigiinnermut attaveqarfiit annertuallaaratik, avatangiiisinillu mianerinninnissamut piumasaqaatit annertuujutillugit, silap pissusiatalu allanngorarnera ilaatigut pissutaallutik tamaani uuliasiorsinnaanissaq akisussaqaaq, GDF Suez Grønlandip pisortaata Johannes Finborudip Politikenimut oqaatigaa.
Uuliasiornermut atatillugu imminut akilersinnaanerusutut nalilikkatik uuliasiortitseqatigiiffiit aallukkusunneruaat, soorlu Norgep avataani Barentip Imartaani uuliasiornissamut kajumissuseqarnerullutik.
- Uulialli niuffaffinni piumaneqarnerata siunissami nalorninartoqarnera eqqarsaatigalugu, Kalaallit Nunaanni uuliasiorsinnaanissaq nalorninartortaqarneruvoq, aningaaserivissuup Nordeap uuliasiornermut atatillugu naliliisartuata Thina Margrethe Saltvedtip aviisimut oqaatigaa.
Uuliasiorsinnaanissamut akuersissutit uuliasiortitseqatigiiffinnit arlalinnit tunuartinneqarnerat, Aatsitassanut Naalakkersuisoqarfimmit ugguarineqarpoq.
- Aap, aasaru uuliasiortoqarnavianngilaq. Tamanna ilisimavarput. Kalaallilli Nunaat isorartoqaaq, assersuutigalugulu sumiiffimmi ataatsimi uuliamik nassaartoqarsinnaanngippat, nunap immikkoortuani allami imaassinnaasoq nassaartoqarsinnaasoq, Aatsitassanut Naalakkersuisoqarfimmi pisortaagallartup Jørgen T. Hammeken-Holmip aviisimut Politikenimut oqaatigaa.
