Nunatta aningaasaqarnera aalisarnermut pituttorsimannginnerussaaq. Taamaammat naalakkersuisut nunatsinni uuliasiornissamut pilerisaarinerujussuarmik aallartitsipput. Toqqorsivimmit assiAssi: Jo Christian Oterhals/Flickr Creative Commons

Uuliasiornermut periusissiaq nutaaq: Inatsisartuni illuatungiliuttut qisuariaatigaat

Nunatsinni uuliasiorneq nunatta karsianut iluanaarutaalluassaaq, taamaaliortoqarnissaali Inatsisartuni illuatungiliuttunit tigulluarneqarpallaanngilaq.

Inatsisartuni illuatungiliuttut, naalakkersuisut uuliasiortitseqatigiiffiit nunatsinni uuliasiornissaannut ussassaarlugit uuliasiornissaannullu ammaassivigeqqillugit uuliasiornermut periusissiaat, malunnartumik iluarivallaanngilaat.

Nunatsinni uuliasiornerup nunatta karsianut iluanaarutaanissaa, nunatsinnilu aningaasaqarneq aalisarnermut, nunatta aningaasaqarniarneranik napatitsilluartuusumut siunissamilu napatitsilluarunnaarsinnaasumut, pituttorsimavallaarunnaarnissaa siunertaapput.

Uuliasiornermut periusissiaq

 

  • Naalakkersuisut 2020-mit 2024-mut uuliasiornermut periusissiaq ukioq nmanna jannuaarip naanerani akueraat.

 

  • Nunatsinni uuliasiornerup soqutigineqaqqilernissaa periusissiami pingaarnertut aallunneqarpoq.

 

  • Sumiiffinnik pisinnaatitsissuteqarfinnik nutaanik ammaaneq, nunami taamatullu sinerissap avataani.

 

  • Nunap sannaanut aammalu geofysiskinut suliniutinik pisinnaatitsissutinut politikkimut akuusutut ilaatillugu ingerlatsinissaq.

 

  • Uuliasiornermut suliffissuarnut iliuuseqarluni nittarsaassilluni suliniuteqarneq.

 

  • Atugassarititaasunut killissaliussanik naleqqussaaneq, ilanngullugu ’first-mover’-nut aaqqissuussineq nutaaq, periusissiap atuuffissaani atuuttussaq, naapertorlugu akileraarusiisarnerup annertussusaanik immikkut naleqqussaanissaq.

 

  • Naalakkersuisut siulittaasuata, Kim Kielsenip, nunatsinni sumiiffiit pillugit akuersissutit nutaat saqqummiunneqartut sapaatit akunneranni 6-imi Houstonimi ussassaarutigiartorpai.

 

  • Tamatuma kingorna Namminersorlutik Oqartussanit atorfilittat Londonimut  februarip ulluisa qulinganni nittarsaassiartorput.

Paasissutissat: Naalakkersuisut

Tatuma kingunerisaanik Kim Kielsen tungujortumik qalipaatilimmik annoraalisarluni USA-mi uuliaqarfissuarmut, Texasimut, qujanarniariartorluni tikeraarpoq. 

Uuliasiornissamilli siunertaqarneq Inatsisartuni illuatungiliuttunit tigulluarneqarpallaanngilaq. Tamatumunnga atatillugu isumaqataanerminnut akerliliinerminnullu ima tunngavilersuipput:

Akerliliisut: Avatangiisit aalisarnerlu akornuserujussuarneqarataannaasut

Inatsisartuni illuatungiliuttut tunngavilersuinerminni, nunatsinni uuliasiortoqalissagaluarpat avatangiisit aalisarnerlu akornuserujussuarnerataannaammata tamatuma maanna taperserneqarnissaa piffissaasorinnginnerarpaat.

- Avatangiisit pingaarnerpaapput. Nunatsinnili maanna inuussutissarsiuterput aamma illersortariaqarmat nunatsinni uuliasiortoqarnissaa inuiaqatigiiusugut ilumut kissaatigineripput sukumiinerusumik oqallisigisariaqarparput, Inuit Ataqatigiit siulittaasuat, Muté Bourup Egede, oqarpoq.

AAMMA ATUARUK Professori uulia pillugu: Sunniuteqarujussuartartoq nunarsuarmi tamani misilittakkat takutippaat

- Uuliasiornermut periusissiami siunertat nunatsinnilu inuussutissarsiutini pingaarnerpaami siunertat imminnut ataqatigiinngillat. Uuliasiornermut periusissiap siunissami aalisarnermut naleqquttuunissaata qulakkeernissaa sillimaffigineqarsimanngilaq, Pele Broberg Partii Naleqqameersoq oqarpoq.

Atassulli nunami taamaallaat uuliasiortoqarnissaanut tapersiivoq. Partiip taassuma nunatta imartaani uuliasortoqarnissaa nangaanartoqartippaa, Atassummi siulittaasoq, Aqqalu Jerimiassen, oqarpoq.

- Maannamut ilisimasavut ikippallaarput. Nunatta imartaa mingutsinneqarujussuarataannaammat nunatta imartaani massakkut uuliasiortoqarnissaa piviusorsiornerunngilaq. Nunamili uuliasiornermi mingutsinneqarataannaanissaa ungasinnerulluni, Aqqalu Jerimiassen oqarpoq.

Tapersiisut: Nunatta karsianut iluanaarutaasinnaavoq

Naalakkersuisut isumaqarput, uulia pisariaqartinneqartuarallartillugu nunatta uuliasiorneq allatulli isertitaqaatiginiarsarissinnaagaa, Atassullu isumaqataavoq.

- Ikummatissanik atuineq siunissami soorunami millineqassaaq. Nunatsinnilu isumalluutit qanoq isertitaqaatigisinnaanerlutigit aamma isumaliutigilluartariaqarparput. Aalajangernissatsinnut tunuarsimaaratalu aalisarneq piinnarlugu suut tamarmik unitsissanngilavut. Inuussutissarsiutinit allanit aningaasanik isertitaqartariaqartugut, Atassut isumaqarpoq.

Akerliliisut: Nukissiorfinnik ataavartunik atuinerulerneq

Inuit Ataqatigiit uuliasiornissamik misissuisoqarnissaa nunarsuarmi ataavartumik nukissiuuteqarnialeruttornermut naapertuuppallaanngissoraat.

- Nunat tamalaat tamarmik ataavartitsiniarnerat ullut tamarluinnaasa ineriartortoq misissorneqartariaqarpoq. Inuussutissarsiorneq tamanna ilumut inerisarniarparput imaluunniit ataavartitsinerusumik inuussutissarsiornissamik ineriartortitsinermit aningaasaqarnitsinnut ilapittuutaasinnaasut salliutissavagut, Muté Bourup Egede oqarpoq.

Akerliusut: Periusissiaq siammasinngitsoq

Partii Naleqqap Inuit Ataqatigiillu Naalakkersuisut periusissiaat Inatsisartuni ikinnerussuteqartunik tunuliaqutaqarnera tassa pissaaneqarnerit nikinnissaanut mianertartoq isornartorsiorpaat.

- Naalakkersuisut periusissiaat politikkikkut siammasissumik pituttorsimanngilaq. Inuiaqatigiittut nunarsuarmut inuussutissarsiuutaatigut nutaat ussassaarutigilinnginnerani erseqqissumik siunneqqaartariaqarpugut, Mute Bourup Egede oqarpoq.

- Siammasissumik tunngaveqarnani taamatut iliuuseqaraanni taava navianartorsiutigilissagamikku tulliani qinersisoqarnerup kingorna allanngortinneqassagaluarpat. Tamannalu siunissamut allanngujuissuteqarnermik qulakkeerinngilaq, Pele Broberg oqarpoq.

AAMMA ATUARUK Kielsen uuliasiornermut soqutiginnilersitseqqikkusuppoq - iluatsissimanngitsoq akerlilerpaa

Partii Nalerat uuliasiornissamut periusissiamut tapersersortaanngilaq, taamaakkaluartorli nunatsinni piffissap ingerlanerani uuliasiortoqalersinnaanissaa Pele Brobergip oqaatigaa. Tamannali piffissami matumani pissanngilaq, suliffeqarfiillu namminersortut tamatumanik suliniuteqartuussallutik.

- Nunap ataa anignaaserivittut isigineqartariaqarpoq. Uulia nunap iluaniitsiinnarsinnaavarput nunarsuarmilu uuliamik pisariaqartitsilluinnartoqalernissaanut toqqoqqallugu, avatangiisinullu mingutsitsinani uuliasiortoqarsinnaassalluni, Pele Broberg oqarpoq.

Naalakkersuisoq: Periarfissanik isiginngittuusaariinnassanngilagut

Inuussutissarsiornermut nukissiuuteqarnermullu naalakkersuisoq, Jess Svane (S) isornartorsiuisoqarneranut tupinnanngitsumik isumaqataanngilaq.

- Periarfissanik isiginngittuusaariinnarsinnaanngilagut oqalullutalu nunatsinni aalisarneq isertitagut 90 procenti sinnerlugu taamaallaat pissarsiarisarlutigit. Taava taanna arlaatigut innarlerpat, sunami qiviassagatsigu, naalakkersuisoq oqarpoq.

- Nunat allat akissaqarumallutik uuliamik massakkut annertuumik qalluipput takusinnaagamikku 2040 tungaanut pisariaqartitsigaluttuinnartussaasut oliemik suli. Minguittumik nukissiuteqalernissamut tassuunakkut akissatik katersorusullugit.

- Qalluisoqalissagaluarpat, taanna malugalugu suli qalluisoqanngilaq aamma uuliasiorniartut suli aallartinngillat avatangiisinut minnerunngittumik qanoq sunniuteqarnerlussinnaaneri inuiaqatigiinnut piujuaannartitsinermut siunertaqartunut qanoq sunniuteqarsinnaaneri tamaavimmik akornuteqanngitsumik qulakkeerneqarlutik inatsisitigut sakkortuumik inissinneqarnikuupput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat