Uuliasiorluni qillerineq pillugu misissuinerup inernera ICC-p Naalakkersuisunut tunniuppaa
Misissuinerup siunertarivaa suliami taamaattumi periuutsit Issittup nunataani allami ileqquusunut naleqqiullugit qanoq innersut aammalu malittarisassat ilumut malinneqarsimanersut kiisalu suleriaatsimi suut pitsanngorsartariaqarnersut suullu
ajunngitsuunersut naligiimmik oqimaalutarniarneqarsimapput.
Nalunaarusiaq maanna ICC-p siulittaasuanit Aqqaluk Lyngimit ulloqeqqata siorna Aatsitassat pillugit naalakkersuisortaaq Jens-Erik Kierkegaard ataatsimeeqatiginerani tunniunneqarpoq. Nalunaarutip nassuiaateqarfigai Aatsitassat pillugit Naalakkersuisoqarfiup paasissutissat tunniussinnaasimasai.
ICC-p neriuutigaa teknikkikkut nalilersuinerit uparuaassutillu siunissami Naalakkersuisut aammalu pisortaqarfiup atorluarumaarai nutaamik qillerinissamik akuersissuteqaqqitsigani.
Misiliilluni uuliamik imaani qillerinermi misissukkat pingaarnerit pingasunut agguataarsimapput. ICC-p Oceans North-illu misissuititsinerata takutippaa Cairnip 2011-imi uuliamik maqisooriataarnissamut pinaveersaartitsinermut aammalu maqisoortoqarpat qanoq iliuusissanik pilersaarutai sanngiitsortaqartut. Tassani pingaartumik maqisoortoqassagaluarpat qanoq annertutigisumik aqussinnaanngisamik pisoqarsinnaanerata naliliiffigineqarnera isiginiagassaavoq.
Ataatsimut isigalugu nalilersuinerup takutippaa innuttaasut piareersaatinut sulianullu tunngatillugu annikippalaarujussuartumik ilisimatinneqartarsimasut taamaattumillu pisunut akuunissaminnut periarfissakitsuararsuusut taamaattumillu Naalakkersuisut piumaffigineqarput siunissami tamanut ammanerujussuarmik periuuseqartariaqalersoq.
Nalunaarut tuluttooq tamakkiisoq Project Review: Cairn Energy’s 2011 Offshore Drilling in West Greenland” ICC-p nittartagaani www.inuit.orgtakuneqarsinnaalissaaq.
