Uuliap aqqutissaa assortuussutaasoq Canadami akuersissutigineqartoq

Ruujorip allinerneqarneratigut uuliap assartorneqartareersup pingasoriaataa Albertaminngaanniit Vancouverip umiarsualiviatigut Manerassuakkoortillugu nunanut allanut ingerlanneqarsinnaalissaaq.

Isornartorsiuisulli ruujorip avatangiisinut aserorterinissaa ernummatigaat. Nutaarsiassaqartitsivik AP taama allappoq.

- Suliniutip Trans Mountainip aallartinneqarnissaa naalakkersuisut akuersissutigaat. Suliffeqarfiup assaalluni aallartinissaq pilersaarutigaa, premierminister Justin Trudeau tusagassiortunik katersortitsilluni oqarpoq.

Uuliap aqqutissaata ruujori alla 1953-imeersoq taarsissavaa. Aqqutip nutaap uulia Albertamiit Vancouverimut assartugassaata uuliap nappartat 890.000-it nalingaa. AFP taama allappoq.

Canadap uuliaatimi annerpaartaa USA-mut ullumikkut nioqqutigisarpaa, uulialli aqqutaata nutaap atulerneratigut amerikamiunik pisariaqartitsinnginnerulernissaq neriuutigineqarpoq.
Taamaammat suliniut aamma ”Canadap soqutigisaarigaa” Trudeau isumaqarpoq.

Uuliamulli aqqut naalagaaffiup pigisaa pillugu innuttaasut avatangiisillu pillugit suliniaqatigiiffiit assigiinngitsut akerliussutsimik takutitsisaqaat.

Naalakkersuisullu suliniummut maanna aappassaaneerlutik akuersipput.

Siullermik 2016-imi akuersissutigaat, eqqartuussivimmiilli ingerlatitseqqiisarfimmit nunap nukissiuutit pillugit ataatsimiititaliaata ruujorimut aqqummik nutaamik naliliinissaa piumaneqarmat suliniut unitsikkallarneqarpoq

Misissuineq siulleq ”amigangaatsiartoq” oqaatigineqarpoq.
Ullumilu – qaammatit qulit qaangiuttut – sanaartorneq aallartinneqarsinnaalerpoq.

Sulialli inatsisartunut nutaamik oktobarimi qinersisoqarnissaanut pingaaruteqangaatsiarsinnaanera naatsorsuutigineqarpoq.
Ingammik uuliap aqqutissaanut akerliusut amerlanersaat Justin Trudeaup qinersisartorimmagit. Nutaarsiassaqartitsivik, AFP allappoq.