Utoqqalinersiat allanngortiternissaannut alloriarput
Utoqqalinersiutinut malittarisassat allanngortiternissaannut alloriarneq angisooq siulleq inatsisartut ualeq aalajangiuppaat.
Periaaseq allanngortillugu malittarisassani utoqqalinersiutit aamma sulisinnaajunnaarnersiutit immikkoortinniarneqarput.
Utoqqalinersiutit qaffanneqassapput, tamatumalu peqatigisaanik utoqqaat 65-ileereeraangamik aatsaat utoqqalinersiuteqalersinnaassallutik. Ullumikkut 63-ileereeraangamik utoqqalinersiuteqalertarput.
Malittarisassat allanngortinnerat nunatta karsianut aningaasarpassuarnik naleqassaaq. Utoqqalinersiutinut aningaasartuutit ukiumut 40 millioni koruuninik amerleriarnissaat naatsorsuutigineqarpoq.
Utoqqalinersiutinik aaqqissuusseqqinnermut atatillugu aningaasartuutit matussutissaqartinniarlugit naalakkersuisut akileraarutit 2 procentimik qaffanniarpaat.
Inatsisartut naalakkersuisut ullumi pisussaaffilerpaat, Inatsisartut tullianik ataatsimiinnissaannut inatsisissamik siunnersuusioqqullugit.
Taamaalilluni inatsisissaq aappaagu juulip ulluisa aallaqqaataanni atuutsinneqalersinnaaniassammat.
