Siulittaasoq tunuartoq: Utoqqaat partiiat qatsuppara
Kaaleeraq Møller Andersen maajip qeqqani Siumut Sisimiuni siulittaasunngorami, Siumut nuna tamakkerlugu ataatsimeersuarnerani peqataassalluni isumaqarsimagaluarpoq, taamatullu Siumut siunissaanut sunneeqataassalluni.
Maannali qaammatit marluk siulittaasooreerluni, Siumut Sisimiut qaammatip naanerani ataatsimeersuannginnerani, tunuarnini nalunaarutigaa.
Møller Andersenip siulittaasunngornermi kingorna Naalakkersuisut Siumullu siulittaasuat Kim Kielsen sakkortuumik isornartorsiornikuuaa, ilaatigut Nunatta namminiilivinnissaa pillugu sulinera apeqquserlugu.
AAMMA ATUARUK Kielsen namminiilivinnissaq pillugu nangaanerarneqartoq
AAMMA ATUARUK Siumumi avissaartuunnermi siulittaasoq isorineqartoq
Taannalu Kim Kielsenimut tapersersuisuunnginnini pillugu tunuartitaasutut isumaqarpoq.
Siumut Sisimiup maajimi ataatsimeersuarnerani peqatigiiffiup aningaasaqarnera eqqartorneqartussaavoq. Siumut Sisimiuni siulersuisut immikkut ataatsimeersuarnissamik kissaateqarneratigut ataatsimeersuartoqassaaq, naak Møller Andersenip siulittaasutut ataatsimeersuarnissaq Siumut nuna tamakkerlugu ataatsimeersuareernerani pinissaa kissaatigigaluaraa.
Møller Andersenip tusagassiuutinut nalunaaruteqarnermini ilinniakkaminik naammassinninnini Uummannamullu uterniarnini tunuarnerminut tunngavilersuutigigaluarpaa.
Taassumali KNR-imut oqaatigaa ataatsimeersuarnermi immikkut ittumi, Kim Kielsenimut tapersersuisuunginnini pillugu, uppisitaanissani qularalugu, maannalu tamanna pitinnagu tunuarniarluni aalajangerpoq.
Møller Andersenip oqaatigaa partiimi pissaaneqarniuunneq qatsullugu.
- Utoqqaat partiiat qatsuppara. Siulittaasutut ataqqineqanngilanga, naak amerlanerussuteqartut siulittaasutut taanikuugaluaraannga, Kaaleeraq Møller Andersen KNR-imut oqarpoq.
- Ataqqeqatigiilluni isummersorsinnaaneq amigaatigaara. Inuusuttuusugut isummagut assigiinngikkaluartut ataqqeqatigiilluta oqallittarpugut. Partiimiittutoqqalli ataqqinninnatik namminneq isummatik kisiisa malinniartarpaat, Møler Andersen oqarpoq.
