Kielsen namminiilivinnissaq pillugu nangaanerarneqartoq

Sisimiuni Siumut immikkoortortaqarfiani ataatsimeersuarnermi amerlanerussuteqartut nunatta aqunneqarnera isornartorsiorpaat.
Assi © : Siumut Sisimiut
maajip 15-at 2017 15:40
Nutserisoq Connie Fontain

Siumut Sisimiut Kim Kielsenimik iluarisimaarinninngilaq, ilaatigullu partiip siuttua namminiilivinnissamik kissaateqarnermut tulluannginnerarlugu isornartorsiorneqarpoq.

Sisimiuni Siumut immikkoortortaqarfiat sisamanngorpat ataatsimeersuarpoq. Tassanilu nunatta maanna aqunneqarnera amerlanerussuteqartunit naammagisimaarneqanngitsoq paasinarsivoq.

Sisimiuni Siumut partiianni siulittaasunngoqqammersoq, Kaaleeraq Møller Andersen taama nalunaaruteqarluni allappoq.

- Ataatsimeersuarnermi Siumut Sisimiuni ilaasortat amerlanerussuteqartut nunatta maanna aqunneqarnera kiisalu Naalakkersuisuni sammiveqannginnerujussuaq iluarisimaarinninngillat, Kaaleeraq Møller Andersen allappoq Siumut Sisimiullu Siumumi avissaartuuffiusumi nutaamik siulittaasortaarusunnerarpai.

Iluarisiaarinninnginnerat namminiilivinnissamut partiip siuttuata isumaanut aamma tunngavoq. Uanilu siulittaasunngoqqammersup erseqqissarpaa, Siumut nunatta kiffaanngissuseqarneranik erseqqilluinnartumik politteqartoq tassalu nunarput namminiilivissasoq. Uanilu aqutsisoq uummaarissumik aqutsinnginnerarlugu Kaaleeraq Møller Andersen allappoq.

- Naalakkersuisut Siumullu siulittaasua namminiilivinnissaq pillugu nangaasumik isummertarsinnaanngilaq, Siumut Sisimiuni siulittaasunngorlaaq allappoq. 

Siumut Sisimiuni siulersuisuini ilaasortat siulittaasup saniatigut tassaapput; Dorthea Isaksen, Hans Frederik Olsen kiisalu Frederik Olsen.