Utaqqisitsisarnerup sivisuallaarnera naalakkersuisup nassuerutigaa

Eqqumiitsuliornikkut Pinngorartitsisut Ingerlatsisullu kattuffiat, EPI, taama utaqqineq sivisuallaarnera pillugu isornartorsiuivoq.
 
- Tamanna akuerisinnaanngilarput. Ilaasortatta suliniarnerminni suliartik naammassiniarnissaannut aningaasanik atuiumallutik qinnuteqarnerminni piareersalereersimasarmassuk. Inaarnissaanut aningaasartuuteqartussaanertik  pissutigalugu qinnuteqartarput. Taamaattumillu sulinissartik tamaat aallaqqaataaninngaanniit naammassinissaata tungaanut pilersaarusioreersimasarmata. Ajuusaartarnartorujussuuvoq taamatut utaqqilussinneqartarnerat, EPI-mi, siulittaasoq Leif Saandvig Immanuelsen taama oqarpoq.

Sullissineq arriippallaarnerarlugu EPI maalaaruteqarpoq

Karitas Production, Pipaluk Kreutzmann Jørgensenimit pigineqartoq Filmpujlemut martsip aallaqqaataanili qinnuteqarsimavoq. Taanna nipilersornermut tunngasumik filmiliorniaraluarpoq, Kalaallit Nunaaniit Danmarkimiillu suleqateqarluni. Filmiliorneq una aasaq aallartittussaagaluarpoq, sulili piviusunngorsinnaanngilaq, Naalakkersuisoqarfimmiimmi suli akineqarnissani utaqqigamiuk.
 
- Kinguaattoorujussuaqqavugut. Massakkut suna tamarmi nalunarsigallaqqavoq. Allatut ajornartumik suliassatsinnik kinguartitsisaqattaartariaqarsimavugut. Ukioq naalerpat aatsaat aallartittariaqassagunarpugut.
 
Pipaluk Kreutzmann Jørgensen oqarpoq.
 
Aningaasaliissutaasunut qinnuteqaatit suliarinerinut sapaatit akunneri ikinnerpaamik tallimat atorneqassasut ilisimatitsissutaareertoq, Naalakkersuisoqarfimmiit allapput. Aamma naatsorsuutigineqarsinnaasoq, sapaatit akunneri arfineq pingasut allaat tikillugit utaqqisoqarsinnassasoq.
 
Nuna tamakkerlugu Erinarsoqartigiit Sisimiuni katerisimaarnissaannut atugassanik Tips- & Lottomut apriilip ulluisa 15-iani qinnuteqaat nassiunneqarmalli suli akineqanngilaq.

Akiniaasaarneq peqqutaalluni Erinarsoqatigiit Sisimiuni katerisimaarnissaraluat taamaatiinnarneqartariaqassasoq, Nuna tamakkerlugu Erinasoqatigiinni siulittaasoq Oline Augustinussen oqarpoq.
 
Taava aamma Kulturimut tapiissutitigut Nunavumut suleqateqatissarsiornermi aningaasartuutissanut matussutissanik qinnuteqaatit suli, februarip 15-anili nassiunneqartut, ulloq mannamut akineqarsimanngitsoq, EPI-miit oqaatigineqarpoq.
 
Taamaattumik EPI-p, Kultureqarnermut Naalakkersuisoq, Nick Nielsen kaammattorpaa, Namminersorlutik Oqartussat kulturikkut immikkoortortaqarfiata naammassinnissinnaanera qaffassaqqullugu.
 
Inatsisartunik sullissineq sulianik kinguaattorussinermut peqqutaasoq, Naalakkersuisoqarfimmiit allapput.
Qinnuteqartut utaqqisinneqarlutik oqaluttut Kultureqarnermut Naalakkersuisup paasisinnananginnerarpaa.
 
- Qinnuteqartut ilaasa qinnuteqaatissat naapertorlugit suliarisimanngikkaangatigit uteqattaartillugit taamatut ingerlasarnerat toqqammaviusinnaavoq. Aappaattut oqaatigerusutara allaffissornermi amigaateqarluta Naalakkersuioqarfimmi inissisimavugut, soorunami taanna aamma peqqutaaqataasunut ilaavoq. Qinnuteqartut tamarmik kalerrinneqartarput oqaloqatigineqarlutillu allakkatigut. Taamaattumik paasiuminaatsippara qinnuteqartut ilaat oqariartorpat naalakkersuioqarfimmiit tusagaqanngivissorsimallutik, Nick Nielsen taama oqarpoq.
 
Naak Naalakkersuisoqarfiup quppernermik ataatsimik sinneqartumik takissuseqartumik akissuteqaraluarluni oqaatiginngilaa qinnuteqaatigineqartut qaqugu akineqarumaarnersut.
 
Qinnuteqaateqartartulli inappaat, piffissaagallartillugu qinnuteqaateqartaqqullugit, imaanngitsoq piffissaq kingullerpaakkut qinnuteqartassasut.