USA Ukrainelu isumannaallisaanissamut isumaqatigiissummik ukiuni qulini atuuttussamik atsioqatigiittut
Ukiuni qulini atuuttussamik isumannaallisaanissamut isumaqatigiissummik G7-imi nunat ataatsimeersuarnerannut atatillugu USAmi præsidenti, Joe Biden, Ukrainellu præsidentia, Volodymyr Zelenskyj atsioqatigiipput.
Ukrainep Ruslandimut sanilliullugu nukittussusaa sakkortusassavaa.
Ukrainemik tapersersuinissamik siunissami USA-mi naalakkersuisunik pisussaaffiliinissaq isumaqatigiissutsip siunertaraa.
Atorfillit malillugit aamma tamanna pissalluni Donald Trump USA-mi præsidentit tulliattut qinerneqassagaluarpat.
Illersornikkut atortunik nutaanngilisunik Ukrainep sakkoqarnera siunissaq ungasinnerusoq eqqarsaatigalugu USA-miit ineriartortitsisoqarnissaa isumaqatigiissummi oqaasertalersuisoqarpoq. NATO-mut siunissami Ukrainep ilaasortanngorsinnaaneranut USA ikiuuttussatut atortussaassaaq.
Isumaqatigiissummi allaqqavortaaq Ukrainemik russit saassussinerani sioorasaarineraniluunniit akunnerit 24-t qaangiutinnagit USA-mi Ukrainemilu qullersat akissuteqarnissaq pillugu isumasioqatigiissasut. Tamannalu pissasoq Ukrainep illersornissaminut pisariaqartitai aalajangersaaffigissallugit.
Italiap kujataani tusagassiortunik katersortitsinermi Joe Biden oqarpoq nunani G7-imut ilaasortat naalagaaffinni qullersai naalakkersuisunilu siulittaasuisa isumaqatigiissutigigaat Ukrainep 50 mia. dollarsinik atukkinneqassasoq (tassa 347 mia. kroniit missaat).
Bidenip tikkuarpaa Ruslandip præsidentianut Vladimir Putinimut mianersoqqussutaasoq.
Natomut sukkasuumik ilaasortanngornissamut sivisuumik Zelenskyj ilungersorluni oqaaseqartarsimavoq.
Natomili ilaasortat tunuarsimaarsimapput. Natomi inatsisit tallimaanni aalajangersagaavoq Natomi ilaasortamik saassussineq, Natomut tamarmut saassussinerusoq akineqassasorlu.
Sorsunnerup nalaani Ukraini ilaasortanngussagaluarpat NATO Ruslandimut sorsunnermut qanillattortissagaluarpaa atomilu atorlugit sakkussiarsuarnik aserortereqisunik sorsunnermik kinguneqaratarsinnaalluni.
