USA-p Rusland sakkutuuminik naalakkumanngitsunik toqoraasimasutut pasigaa
![](/sites/default/files/styles/image_934x467/public/2023-10/20231024-195447-L-8256x5504ma.jpg?itok=JFnEmdCd)
USA nalunaarpoq, Ruslandip nammineq sakkutuuminik toqoraasarsimasoq tusarsimallugu. Rusland pasisaanini pillugu maannamut oqaaseqanngilaq.
Ruslandip nammineq sakkutuuni, Ukrainep kangisissuani saassussinernik sakkortusaanerni peqataaqqullugit naalakkerneqartut piumanngitsulli pillarlugit toquttarai USA-mit oqaatigineqarpoq.
Pasinninnerit USA-mi Nunami Namminermut Isumannaallisaanermut Siunnersuisoqatigiivini oqaaseqartartup John Kirbyp sisamanngornermi saqqummiuppai.
Aamma oqarpoq, Ruslandi sakkutuunik sakkussanillu arlalissuarnik maannamut annaasaqangaatsiareersoq.
- Paasissutissanik, Ruslandimi sakkutooqarfiup sakkutuuminnik, naalakkiutiminnik tusaanngitsunik pillaallutik toqutsisarneranik, apuussivineqartarpugut, oqarpoq.
- Aamma russit sakkutuuisa qullersaasa sakkutooqatigiikkaat, Ukrainemiut saassussillutik tungiminnut eqqaassileraangata tunuarterniartartut pillarlugit tamakkerlutik toqunneqartassasut siooratasaarutigisarsimagaat USA-p tusarfinnit paasisimavaat.
- Assuarnarluinnarpoq, nangippoq.
USA-p pasilliutit tamakku qanoq paasisimanerai John Kirby aperineqarami, erseqqissumik nassuiaasinnaasimanngilaq.
Ruslandilu pasilliutit pillugit maannamut akissuteqanngilaq.
Ruslandip Ukrainep kangisissuata kujataani illoqarfiup Avdijivkap qanitaa maanna saassutarivaat. Avdijivka Ukrainep nunatut immikkoortuani Donetskimiittuuvoq.
Aamma Ukrainep kangisissuata avannaaniittoq Kupjansk ukiorpallaartinnagu russit maanna isaaffiginiarsaraat.
Kirbyp paasisani malillugit Ruslandip maannamut qamussuit eqqarasuartaatitallit ikinnerpaamik 125-t saassussinerni atukkatik annaareeraat oqaatigaa – aamma oqarpoq Ruslandip nunataani inuit tusindilikkaat maannamut eqqugaareersut.
- Ruslandip sakkutooqarfiata saassussinerminni "human wave", sakkutuut sanileriiaartillugit malittut tulleriiaarlugit saassunniakkamut isaatittaraat, aamma oqaatigaa.
- Taamaammat Ruslandip sakkutuuminnik annaasaqangaatsiartarnerat tupaallannanngilaq. Periuserineqartumimi, sakkutuut pisuinnaat amerlasuukkaarlutik akeqqaminnik saassussitinneqartarput.
Taamannak pissuseqarneraaneq aamma Ruslandip maannamut upernarsarlugu oqaatiginngilaa.