USA-p præsidentiata Danmarkip kunngikkormiui inuulluaqqussummik nassikkai
USA-p præsidentia, Joe Biden, dronning Magrethemut kunngi Frederimullu kunnginngortitsinermut atatillugu sapaammi ilassinnippoq.
USA-p præsidentiata illorsuata nittaartagaani tamanna atuarneqarsinnaavoq.
Joe Biden dronning Margrethemut USA sinnerlugu pilluaqqusivoq. USA-p Danmarkillu akornanni ataqatigiinnermik patajaallisaaqataasimaneranik aamma qujassuteqarfigaa.
- Dronning Margrethe naalagaaffimmi ukiuni 52-ini qullersaavoq. Piffissami tassani USA-mi præsidentitut atuuffillit qulinit amerlanerupput. Kunngeqarfik Danmark USA-lu sillimaniarnermut niueqatigiinnermullu atatillugu ukiuni taakkunani qaninnerulerput. Aamma USA-mi Danmarkimilu inuiaat ikinngutigiinnerulerput, præsidenti ilaatigut allappoq.
- Dronning Margrethep nunaminut inuinullu pisussaaffimminik ukiuni qulikkaani tallimani kingullerni pimoorussilluni namminissarsiunngitsumik aalajaatsumillu sullissivoq, tupinnaannartumillu maligassiuilluni, præsidenti allappoq.
Bidenip kunngi Frederik qulingat aamma pilluaqquaa.
- USA-mit kunngip Frederiup qulingata kunnginngorneranut pilluaqquarput, kunngeqarfimmillu Danmarkimik ukiuni 200-nit amerlanerusuni peqatigiinnitsinnik suleqatigiinnitsinnillu nangitsinissatsinnut qilanaarluta, præsidenti allappoq.