USA-p nunatsinni sinniisoqarfia naalakkersuisoqatigiilersussat pingaarnertut suut suliniutigisariaqarneraat paaserusullugu inatsisartunut qinersisoqarnissaanut atatillugu Kalaallit Nunaanni partiinut tamanut saaffiginnissimavoq ataatsimeeqatiseralugillu.

Aviisi Politiken, qaaqqusissutit aallavigalugit taama allaaserisaqartoq nutaarsiassaqartitsiviup Ritzauip issuarpaa.

- Sinniisoqarfitsinnut tikilluaqqorusuppassi, allaffissinnulluunniit ornigulluta. Partiinut tamanut saaffiginnippugut, Washingtonimi aalajangiisartut Kalaallit Nunaanni politikkikkut qanoq pisoqarneranik paasisaqarnerulerniassammata, USA-p nunatsinni partiinut qaaqqusissutaani ilaatigut allassimavoq. Politiken taama allaaserisaqarpoq.

USA-p sinniisoqarfiata nunatsinni partiinut qaaqqusissut ukioq manna februaarip ulluisa 21-anni nassiuppaa, kalaallisut, danskisut tuluttullu allagaalluni.

Demokraatit siullitaasuata Jens-Frederik Nielsenip, Atassutillu siulittaasuata Aqqalu Jeremiassenip qaaqqusissut nunatsinni qinersinermut sunniiniarnertut isigaat. Politiken taama allappoq.

Kalaallit Nunaata USA-mit aqunneqalernissaa kissaatigalugu USA-p præsidentiata Donald Trumpip siorna decembarimili arlaleriarluni oqaatigisarpaa.

Trump USA-mi inatsisartunut sapaatit akunnerata siuliani oqalugiarami kissaat taanna saqqummiuteqqippaa.

Kalaallit Nunaannut aningaaanik milliardilikkuutaanik aningaasaliiniarnini kalaallilu pisoorsuanngortinniarlugit Trumpip tassani ilaatigut oqaatigaa.

Trumpilli iliuusaa Kalaallit Nunaannut ataqqinninnginnerusoq, naalakkersuisut siulittaasorigallagaata Múte B. Egedep DR-imit apersorneqarluni taamani oqaatigaa.