Amerikamiut præsidentiat, Donald Trump nunatsinnut dollarsinik aningaasaliiniarpoq. USA Kalaallit Nunaannut dollarsinik milliardilikkaanik aningaasaliinissaminut piareersimasoq kalaallillu pisuunngortinniarai præsidenti inoqatinut attaveqaatikkut Truth Socialikkut allappoq.

Inatsisartunut qineqqusaarnerup naammassilernerani taanna taama nalunaaruteqarpoq. Taamaakkaluartorli Donald Trumpip nalunaaruteqaqqinnera tupaallannanngitsoq, Dansk Institut for Internationale Studierimi (DIIS) ilisimatusartuunerup, Ulrik Pram Gadip nalilerpaa.

- Trump kalaallinut qinersisartunut, USA-mut akuersaartumik qinersinissaannut qularnanngitsumik sunniiniarsarivoq.

- Kalaallit qinersisartut Trumpip soqutiginninneranik maluginiaasimasoraakka. Ilaasa soqutiginartippaat. Amerlanerilli tamanna tutsuiginarpallaanngitsoq pilerinarpallaanngitsorlu isumaqarput, taanna oqarpoq.

Donald Trumpi Truth Socialikkut allaatigisami allappoq:

- Kalaallit Nunaanni suliffinnik nutaanik pilersitsinissamut pisuunngortitsinissatsinnullu dollarinik milliardilikkaanik aningaasaliinissatsinnut piareerpugut.

Nunarsuup sinnerani atukkat assingi

Donald Trump aalajangiisinnaaguni kalaallit suliffeqarfiinik arlalinnik pilersitsinissamut aningaasaliisoqassaaq.

Amerikamiut præsidentiata nunarput amerikamiunngortikkusullugu oqaaseqartarnermigut qaammatini kingullerni ukkatarineqartippaa.

Taassumalu USA-p nunatsinnik aqutsilernissaanut sakkutooqarnermik atuissanngitsoq mattukkusunnagu.

DIIS-imi ilisimatusartuunerup, Ulrik Pram Gadip oqarnera naapertorlugu naalakkersuisunngortussat nunatta oqaluttuarisaanerani sakkortunerpaamik suliassaqarput. Assi © : Arthur Cammelbeeck/Ritzau Scanpix

Taamaammat naalakkersuisunngortussat nunatta oqaluttuarisaanerani sakkortunerpaamik suliassaqassasut, Ulrik Pram Gadip nalilerpaa.

- Kalaallit naalakkersuisuinit suliarineqarsimasuni sakkortunerpaassaaq. Nunarput taamaalilluni nunat allat soorlu Canada, Europamilu nunat aamma Japan Korealu assigalugit atugaqarpoq. USA-mi suleqatigisarput qanoq ittuunersoq qanorlu isumagissaneripput piviusumik naluarput.

Nunanut allanut tunngasunut naalakkersuisuugallartoq, Siumumeersoq, Vivian Motzfeldt Donald Trumpip oqaaserisai ataqqinninnginnersut aperineqarami ima akissuteqarpoq:

- Aap, tassani qulangiinnarluta toqqaannartumik oqaloqatiginata oqalunneruvoq, taamaammallu nunarsuup sinneranut nunanullu pissaaneqartunut allanut oqalunnerminut nunarput atoraa isumaqarpunga, Vivian Motzfeldt oqarpoq.

Inatsisartunut aqagu marsip ulluisa aqqarnanni qinersisoqassaaq.