USA-p nunanut allanut tunngasunut ministeriata Issittoq pillugu suleqatigiinnerunissaq kissaatigigaa

USA-p nunanut allanut tunngasunut ministeriata, Mike Pompeop, USA-p Danmarkillu Issittumi, tassani nunarput ilaalluni, isumannaallisaanermi suleqatigiinnerunissaat pillugu danskit nunanut allanut tunngasunut ministeriat, Jeppe Kofod (S) oqarasuaatikkut pingasunngormat oqaloqatigivaa.

Pompeop danskit USA-miullu iligiilluarnerat aamma nersualaarpaa. USA-p nunanut allanut tunngasunut ministereqarfianit pingasunngormat unnukkut taama nalunaaruteqarput.

AAMMA ATUARUK Mette Frederiksenip oqaaseqaataa "ajuippoq"

Donald Trump Danmarkimut septembarip ulluisa aappaannit pingajuata tungaanut tikeraarnissaminik taamaatitsimmat, nunanut allanut tunngasunut ministerit marluk oqaloqatigiipput.

- Danmarkimik USA-p iligisaatut suleqateqarnermut Danmarkillu sillimaniarnermi ataatsimoorussanik pingaartitanut tapersiisarneranut nunanut allanut tunngasunut ministerip qujaginninnini erseqqissaatigaa, USA-p nunanut allanut tunngasunut ministereqarfiani oqaaseqartartoq, Morgan Ortagus nalunaarummi oqarpoq.

- Nunanut allanut tunngasunut ministerip, Pompeop, nunanullu allanut tunngasunut ministerip, Kofodip, danskit naalagaaffianni - Kalaallit Nunaat tassani ilaalluni - Issittumi suleqatigiinnerunissaq aamma oqaluuseraat, oqaaseqartartoq ilanngullugu oqarpoq.

AAMMA ATUARUK Jeg forventer at Trump kommer på besøg i fremtiden

Jeppe Kofod Twitterikkut pingasunngormat allappoq, Pompeomik oqaloqateqarsimalluni taakkualu Danmarkip USA-llu akornanni attaveqatigiilluarneq uppernarsaraat.

USA-p nunatsinnik piserusunnera ministeriunermit Mette Frederiksenimit itigartinneqarmat Donald Trump Danmarkimut tikeraarnissaminik kinguartitsilluni Twitterikkut pingasunngormat allappoq.

Nunarsuarmi qeqertat annertunersaat tuniniagaanngitsoq piserusunnermullu oqallinneq isumaqanngilluinnartoq Mette Frederiksen nunatsinnut tikeraarnermini sapaatiummat oqarpoq.

Taassumalu oqaatsit atugai USA-p præsidentianit iluarineqanngillat. Mette Frederiksenip oqaaseqaataa "ajuissoq" Trump tusagassiortunut pingasunngormat oqarpoq.

AAMMA ATUARUK Trumpip tikeraarniarunnaarnera Kielsenip tusaatissatut tiguaa

AAMMA ATUARUK Trumpip taamaatitsiinnarnera uggornarlunilu tupaallannarpoq