Amerikamiut præsidentiata Danmarkimut tikeraarnissaannik qaaqqusineq suli ammatinneqartoq – aamma USA-mut amerikamiunullu innuttaasunut atassuteqarnerup suli qanittuunera Mette Frederiksenip erseqqissaatigaa.Assi: Foto: Malik Brøns

Mette Frederiksen: Trumpip taamaatitsiinnarnera uggornarlunilu tupaallannarpoq

Ministeriunerup Mette Frederiksenip amerikamiut præsidentiata Trumpip Danmarkimut septembarimi tikeraarnissaraluaminik taamaatitsiinnarnera ’uggoralugulu’ ’tupaallaatigaa’, tamanna Københavnimi tusagassiortunik katersortitsilaarnermini oqaatigaa.

- Tikeraarnissaminik taamaatitsiinnarnera uggoralugulu tupaallaatigaara. Tikeraarnissaanut suleqatigiinnittalu pingaaruteqarluinnartup malunnartinnissaanut qilanaaraluarpunga, Mette Frederiksen Københavnimi nunanut allanut tunngasunut ministereqarfiup silataani tusagassiortunut sassarami oqarpoq.

- Naalagaaffeqatigiinnit Issittumi unammillernartut oqallisiginissaannut qilanaaraluarpugut. Amerikamiunik pitsaanerusumik suleqatigiikkusunnerput suli ammavoq, Mette Frederiksen oqarpoq.

AAMMA ATUARUK Aki-Matilda Høegh-Dam: Præsident Trump nunatsinnut tikilluaqqusaavoq

Amerikamiut præsidentiata Danmarkimut tikeraarnissaannik qaaqqusineq suli ammatinneqartoq – aamma USA-mut amerikamiunullu innuttaasunut atassuteqarnerup suli qanittuunera Mette Frederiksenip erseqqissaatigaa.

Ministeriunerulli præsidentiata tikeraarnissaminik taamaatitsinera ajornartorsiornermik pilersitsiffiunngissoraa.

Naalakkersuisut siulittaasuata, Kim Kielsenip ministeriunerullu Mette Frederiksenip Nunatsinnik tunisinissamik itigartitsereerneratigut præsidenti tikeraarnissaminik taamaatitsivoq.

- Kalaallit Nunaata tunisinnaaneranik oqallisiginninnermik pilertoqarnerani Kalaallit Nunaat kalaallillu soorunami qisuariaateqarput. Kim Kielsenip (itigartitsinermik aaqq.) oqaaseqarneranut isumaqataalluinnarpunga, Mette Frederiksen tusagassiortunik katersortitsinermi erseqqissaavoq.

AAMMA ATUARUK Trumpip Kalaallit Nunaat aningaasarpassuarnik tapiissutinillu akilerniaraluarpaa

Ministeriunerulli Kalaallit Nunaata, Savalimmiut, Danmarkillu Issittumi pissutsit USA-p præsidentianik ataatsimeeqateqarnerminni oqallisigisinnaanngimmassuk uggoraa.

- Uanga nammineq Kalaallit Nunaanniit angerlaqqammerpunga. Oqarsinnaavungalu Issittumiikkaanni sillimaniarnermi politikkikkut taakani pitsanngorsaasariaqarnerup pisariaqartinneqarnera qularutissaanngilluinnarpoq. Tamanna ukiuni tulliuttuni pissaaq. Taamaammat septembarip aallartinnerani tikeraartoqarnissap taamaatinneqarnera uggoraara.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat