Medie: Trumpip Kalaallit Nunaat aningaasarpassuarnik tapiissutinillu akilerniaraluarpaa
Amerikamiut præsidentiat Nunarput ataasiartumik aningaasarpassuarnik akiliilluni pisiniariniarlugu piareersimagaluarpoq.
Tamatuma saniatigut USA kalaallit aningaasaqarneranik siunissami pisussaaffimmik tigusiniaraluarpoq.
Amerikamiut aviisiat, Washington Post taama allaaserisaqarpoq, aviisip tusarfiit kinaassutsiminnik isertuussisut marluk, Kalaallit Nunaata pisiarisinnaanissaannut qanimut oqallisiginnittut tusarfigai.
Donald Trumpip danskit ministeriunerata, Mette Frederiksenip (S) Kalaallit Nunaannut tunngatillugu pilersaarutaanik oqallisiginnikkumannginnera pissutigalugu Danmarkimut septembarimi tikeraarnissaraluani pingasunngornerup unnuaani taamaatiinnarpaa.
AAMMA ATUARUK Politikeri: Trumpip taamaatitsiinnarnera mamiatsannarpoq
Washington Postip allaaserisaa naapertorlugu Trumpip naalakkersuisui Danmarkimut neqerooruteqarnissamik ukiumut 600 millionit dollariusoq, tassa Danmarkip Kalaallit Nunaannut naalagaaffimmit ukiumut tapiissutigisartagaata annertussuseqatigisaanik neqerooruteqarnissamut piareersimagaluarput.
Tamatumalu saniatigut Trump ”pisinermi annertusaataasussamik ataasiartumik akiliuteqarnissamut” piareersimagaluarpoq.
USA-lli Kalaallit Nunaannik pisinissaanut Kalaallit Nunaat aalajangiisussaavoq.
Immikkut ilisimasalik: Danmarkip Kalaallit Nunaat tuniinnarsinnaanngilaa
Rasmus Leander Nielsen Ilisimatusarfimmi adjunktiusoq Donald Trumpip pisinissamik pilersaaruteqarnera sapaatip akunnerata siuliani saqqummermat taama oqarpoq.
- Danmarkip Kalaallit Nunaat tunisinnaanngilaa, adjunkti oqarpoq.
AAMMA ATUARUK Politikeri: Trumpip taamaatitsiinnarnera mamiatsannarpoq
Naalagaaffiit Peqatigiit Sorsunnersuup Aappaata kingorna nunap inoqqaavinut tungnatillugu pisussaaffiliisumik malittarisassiornera ilaatigut pissutaavoq, Rasmus Leander Nielsenillu oqarnera naapertorlugu tamanna Danmarkip kalaallit qulangiinnarlugit Nunatsinnik tunisisinnaanngilluinnarpoq.
- Aamma Namminersorluni Oqartussaaneq pillugu inatsimmi 2009-meersumi aalajangersimasumik allassimavoq: kalaallit tassaapput inuiaat nammineertut, Rasmus Leander Nielsen oqarpoq.
Naalakkersuisut siulittaasuata, Kim Kielsenip Nunarput tuniniagaanngitsoq sapaatip akunnerata siuliani erseqqissaatigaa.
Ministeriunerullu, Mette Frederiksenip (S) Nunatta tunineqarsinnaaneranut eqqarsaateqarnissaq ”isumaqanngilluinnarnerarpaa”.
- Kalaallit Nunaat tuniniagaanngilaq. Kalaallit Nunaat danskiunngilaq. Kalaallit Nunaat kalaaliuvoq. Neriuppunga tamanna ilumoorullugu oqaatigineqanngitsoq, ministeriuneq sapaatiummat oqarpoq.
