USA-p Canadallu akornanni uuliamut aqqummut suliniut Trumpip aallarteqqikkusukkaa

USA-p Canadallu akornanni uuliamut aqqummut Keystone XL-imut suliniut USA-p præsidentiata Donald Trumpip aallarteqqikkusuppaa.

Præsidenti nammineq inoqatinut attaveqaqatigiittarfimmini Truth Socialimi taama allappoq.

- Suliffeqarfik uuliamut aqqummik Keystone XL-imik sanasoq USA-mut uteqqittariaqartoq ullumi eqqarsarpunga, uuliamummi aqqummik sanaartornissamut akuersissut Bidenip aqutseqataasalu unitsippaat, Trump ilaatigut allappoq.

- Taamaaliorsinnaanngippata uuliamut aqqummik sanasinnaasoq alla sanasariaqarpaa. Uuliamut aqqutip sananeqarnissaa kissaatigaarput, trump allappoq.

USA-p præsidenterisimasaata Joe Bidenip suliniummut akuersissut pingaarutilik atorunnaarsereeraalu Canadamiut suliffeqarfiata TC Energyp suliniut 2021-mi unitsippaa.

Uuliamut aqqutiliorniarneq avatangiisinut illersuiniaqatigiiffinnit taassuma siuliani isornartorsiorneqangaatsiarpoq, soorlu aamma nunaatillit nunallu inoqqaavisa Keystone XL isornartorsioraat.

Silap pissusiata allanngoriartorneranut ajornartorsiutit pillugit akuersissut peerneqartoq Bidenip taamanikkut tunngavilersuutigaa.

Uuliamut aqqutip pineqartup Canadami nunap immikkoortuanit Albertamit USA-mi naalagaaffimmut Nebraskap tungaanut 2023-mi ingerlanissaa pilersaarutaagaluarpoq, tassanngaanniillu USA-p kujasissuanut Texasimut ingerlaqqilluni uulianut akuiaaffinnukartussatut pilersaarutaagaluarluni.

Suliniut 9 milliardit dollarit missaannik taamanikkut naleqarneragaavoq, tassa 64 milliardit koruunit missaat.

Uuliamut aqqut Keystone XL arlaleriarluni unitsinneqarnikuuvoq. Siornatigut præsidentiusimasup Barack Obamap præsideniutiujunnaalernermini suliniut aamma unitsinnikuuaa.