Naalakkersuisut siulittaasuat Múte B. Egede, USA-p præsidentiata Donald Trumpip unnuaq oqaasiinut maanna qisuariaateqarpoq.

USA-p nunalluunniit allap Kalaallit Nunaat sumut ataniarnersoq aalajangigassarinngilaa.

Múte B. Egede Facebookikkut quppernermini pingasunngornermi taama allappoq.

USA-p Kalaallit Nunaannik piumasaqarnera, USA-p præsidentiata Donald Trumpip USA-mi inatsisartunut kongressimut ippassaq unnukkut oqalugiarnermini oqaatigeqqimmagu naalakkersuisut siulittaasuat akissuteqarpoq:

- Kalaallit Nunaat kalaallit pigaat. Amerikamioorusunngilagut, danskiunianngilagut kalaaliuvugummi. Tamanna amerikamiut siuttuatalu paasisariaqarpaat, pisiassaanngilagut aamma qulaatiinnagassaanngilagut.

- Nunattami siunissaa, nunatsinni uagutsinnit aalajangerneqassaaq, soorunami, naalakkersuisut siulittaasuat oqarpoq.

Kalaallit Nunaat pisiariumallugu USA-p præsidentiata 2019-imi siullerpaamik oqaatigaa, nunarsuarmilu qeqertat annersaasa USA-mit aqunneqalernissaa kissaatigalugu siorna 2024-mi decembarimi oqaatigeqqippaa.

Kalaallit Nunaat Issittumi slllimaniarnermut pingaaruteqartoq Trumpip tunngavilersuutigaa, Ruslandimi Issittumi sakkutuulersuiartuinnarpoq.

Donald Trumpip USA-mi præsidentitut aappassaa ukioq manna januaarimi ivertinneqartup, Kalaallit Nunaat pillugu oqaatsini sakkortuseriaannarpai, pisariaqassappat Kalaallit Nunaat sakkutuulersornikkut aqunneqalersinnaanerarlugu.

Præsidenti kongressimut unnuaq oqalugiarami Kalaallit Nunaanni innuttaasunut toqqaannartumik saaffiginnippoq:

- Siunissarsi pillugu nammineq aalajangeerusunnersi ataqqivarput. Taamaaliorusukkussilu USA-mut ilanngunnissamut tikilluaqquassi.

- Paarissavassi, atugartuunngussaasi, suleqatigiillutalu Kalaallit Nunaat aatsaat taama nukittutigilersissavarput, præsidenti oqarpoq.

Kalaallit nunartik pillugu namminneq aalajangiisuunissaat Múte B. Egedep erseqqissaatigiuarpaa.

Danmarkimi naalakkersuisut assingusumik oqarput. Kalaallit Nunaat Danmark Savalimmiormiullu peqatigalugit Naalagaaffeqatigiinnut ilaavoq.

Kalaallit Nunaata namminiilivikkusunnera Danmarkimit ilisimaneqarpoq. Innuttaasut taasitinneqarnerisigut tamanna taava pissaaq.

Inatsisartunut marlunngorpat marsip ulluisa aqqarnanni qinersisoqartussaavoq.