Ilisimatusartoq: Ukraine USA-p paasissutissaatiminnik avitseqateqartarunnaarnerani isumannarnerulerpoq
Amerikamiut isumannaatsuuniarnermi paasissutissaatiminnik ukrainemiunik avitseqateqartarunnaarnerisigut Ukraine isumannarnerulerpoq.
Majori aamma Danmarkimi illersornisssamik ilisimatusarfimmi ilisimatusartuusoq, Mikkel Storm Jensen, taama naliliivoq.
- Nakkutilliissuterpassuit ataatsimoorluni atukkat Ruslandimut sammisut, nunami kilitsissiaagunik, qaammataasaagunik timmisartuugunilluunniit, amerikamiut tunuarnerisigut ikinneruleqaat, Mikkel Storm Jensen Ritzauimut oqarpoq.
USA isumannaatsuuniarnermi paasissutissaatiminnik ukrainemiunik avitseqateqartarunnaartoq, CIA-p pisortaa John Ratcliffe USA-mi tusagassiorfimmi Fox Newsimi apersorneqartilluni oqartoq, Reuters allappoq.
Taama pineq Ukrainep russit silaannakkut saassussisarnerannut illersorniarneranut kinguneqarnerlorujussuarsinnaasoq, Mikkel Storm Jensen naliliivoq:
- Paasissutissat tamakkua, amerikamiut tunniuttagaat, ukrainemiut erniinnaq kalerriissutigisaraluarpaat. Tamakkununnga russit timmisartuisa sulerinerinut aamma missilinik qanoq ittunik igeriussinerannut kalerriinerusinnaapput, taanna oqarpoq.
Amerikamiut paasissutissaataasa aamma ukrainemiut ikiortaraluarpaat, russit sakkutooqarnikkut inisssisimaffiinik sumiissusersiinerinut saassussinerinullu, taavalu russit sanngiiffiinik atorluaanermut, Mikkel Storm Jensen oqaluttuarpoq.
Paasissutissanut USA-miit takkussuukkunnaartunut Europami nunat taarsiisinnaanerat killeqartoq, taanna aamma naliliivoq:
- Europamiut qanorluunniit sillimaniarnermut paasissutissiisinnaatigigaluarpata, USA tamatumunnga sutigut tamatigut piginnaasalisssuuvoq. Europamiut assersuutigalugu amerikamiusulli qaammataasaateqanngillat, Mikkel Storm Jensen oqarpoq.
Amerikamiut Ukrainemut sakkutooqarnikkut ataasinngormat tapersersuiunnaarnerata kingorna isumannaatsuuniarnermi paasissutissaatiminnik ukrainemiunik avitseqateqartarunnaarnertik nalunaarutigaat.
