Europap sakkussaqarnerulernissaanik angisuumik pilersaarusiulertornissaq Von der Leyenip ilimasaarutigigaa

Europap sakkussalersoqqilernissaa aalajangiisuulluinnassasoq, EU-p kommissioniata siulittaasua Ursula Von Der Leyen oqarpoq, sukumiisumillu pilersaarusiornissamik ilimasaaraluni.

- Europami sakkussalersoqqilernisssaq pisariaqarluinnarpoq, von der Leyen Europami naalagaaffiit arlallit Canadallu siuttuisa Londonimi ataatsimeereerneranni oqarpoq.

Taassuma Europakommissionip tamatumunnga pilersaarutissaatut siunnersuusiornissaa ilimasaarutigaa.

Europamiut illersornissamut aningaasaliissutaat sivisuumik ikippallaarsimasut illersornissaqarfikkullu aningaasalersuerujussuarnissaq pisariaqartoq, taanna oqarpoq.

- Nunat ilaasortaasut illersornissamut aningaasaliinerunissaminnut aningaasaqarnikkut periarfissaqarnerunissartik pisariaqartikkaat, von der Leyen oqarpoq.

Europap sakkussaqarnerulernissaanik pilersaarut angisooq Europami nunat siuttuisa marsip arfernani ataatsimiinissaannut saqqummiutissagini, taanna ooqarpoq.

- EU-p isaumannaatsuunissaanut tunngavoq nunarsuamilu tamarmi illersornissamut tunngasut ullumitut itsillugit ajornerpaamut piareersimasariaqarpugut, taamaammallu illersornissap pitsanngorsarnissaa aalajangiisuussaaq.

Europap tamat oqartussaanerannik illersuinissamut piareeqqanera USA-p ilisimaarissagaa, taassuma kissaatigaa. USA EU-lu siunissami sorsutsaaliornissamik soqutigisaqaqatigiittuusut, taanna isumaqarpoq. USA-mut ima oqarpoq:

- Ilissi tamat oqartussaaqataanerannik illersueqatiginissassinnik piareersimavugut, inatsisinik tunngaveqarluni naalagaaffimmik ingerlatsinermik illersuinissamut.

Taama oqarnera USA-p præsidentiata Donald Trumpip Ukrainellu præsidentiata Volodymir Zelenskyip USA-p præsidentiata illorsuani tallimanngornermi ataatsimiinnerata siunniussamik inerneqannginnerata malitsigaa.

Taama pisoqareersoq Europami nunat siuttui arlallit Zelenskyj-mut tapersersuillutik nalunaarput.