Rusland pillaatitut EU-mit iliuuseqarfigineqaqqittoq

Rusland EU-mit 16-issaa pillaatitut iliuuseqarfigineqarpoq.

EU-Kommissionip siulittaasuata Ursula von der Leyenip, EU-llu præsidentiata António Costap tamanna tusagassiorfinnut ataatsimoorullu nalunaarutigaat.

- Pillaatitut iliuutsit 16-issaat ullumi akuersissutigivagut, Ruslandimut ataatsimoorluta takutitsiniarpugut Ruslandip Ukrainemik saassussinera akerlileripput, EU-mi naalakkersuinikkut siuttut marluk taakku oqarput.

Pillaatitut iliuutsit immikkuualuttortaat Von der Leyenip Costallu saqqummiutinngilaat.

Russilli umiarsuaat assigiinngitsut iliuuseqarfiginiarneqartut siusinnerusukkut saqqummiunneqarnikuuvoq.

Alumiiniumillu Ruslandimit EU-mut eqqusseqqusiunnaartoqarniartoq aamma naatsorsuutigineqarpoq. Tysklandimi nutaarsiassaqartitsivik DPA sapaatit akunnerata siuliani taama allaaserisaqarpoq.

Umiarsuit Ruslandimeersut pineqartut inatsisit malillugit sillimmaserneqarsimasuunngillat, pillaatitut iliuutsit taamaalillutik avaqqunniarneqartarlutik.

Umiarsuit nunani allani nalunaarsorneqarsimasarput, Rusland taamaasilluni assersuutigalugu uuliamik nunanut allanut tunisaqarsinnaalluni.

Umiarsuit 73-it EU-p pillaatitut Ruslandimut iliuuseqarnerani immikkut eqqorniarneqarput, umiarsuimmi pineqartut Ruslandip avammut tunisaqartarneranut atorneqartartut oqaatigineqarpoq.

Ruslandip alumiiniumik nioqquteqarnermit isertitarisartagai ikilisarniarneqarput, aningaasat isertitat Ukrainemut sorsunnermut ilaatigut atorneqartarmata.