Mette Frederiksen Ukrainemi sorsuttoqalerneranit ukiut pingasunngortullu Ukrainemut tikeraartoq

Ministeriuneq Mette Frederiksen Ukrainemi sorsuttoqalerneranit ukiut pingasunngortullu Ukrainemut tikeraarpoq.

Ministeriuneq Mette Frederiksen (S) Ukrainep illoqarfiisa pingaarnersaannut Kyivimut ataasinngornermi tikeraarpoq, Ruslandip Ukrainemik saassussilernerata ukiunik pingasunngornerani tikeraarluni.

Nutaarsiassaqartitsiviup AP-p assingani tamanna takuneqarsinnaavoq. Ministeriunerup Kyivimiinnera allattoqarfiata nutaarsiassaqartitsivimmut Ritzauimut aamma uppernarsarpaa.

Mette Frederiksen Ukrainemi sorsuttoqalermalli arlaleriarluni Ukrainemiippoq. Kingullermik siorna novembarimi Ukrainemiippoq.

Ukrainemi ulluni 1000-ni sorsuttoqarnerani Mette Frederiksen tikeraarpoq. Ministeriuneq nunami tassani sorsuttoqalermalli arfinileriarluni maanna tassa Ukraineliarpoq.

Danmarkip Ukraine timmisartunik malersuutinik, qamutinik sorsuutinik assigiinngitsutigullu ukiuni kingullerni pingasuni ikiorpaa.

Mette Frederiksen naalakkersuinikkut siuttut akornanni Ukrainemut ataasinngornermi tikeraartutuaanngilaq. Norgep ministeriunera Jonas Gahr Støre, Canadallu ministeriunera Justin Trudeau aamma tikeraarput.

EU-mi siuttut aamma tikeraarput, EU-Kommissionip siulittaasua Ursula von der Leyen, EU-llu præsidentia Antonio Costa aamma tikeraarput.

Nunanit allanit Ukrainemut tikeraartut Ukrainep præsidentianik Volodymyr Zelenskyj-mik ilaatigut ataatsimeeqateqassapput.

Nunami sapiitsuliornera tulluusimaarutigalugu taassuma videoliami ataasinngornermi oqaatigaa. Nutaarsiassaqartitsivik Reuters taama allaaserisaqarpoq.

- Ukiuni pingasuni akiuunneq. Ukiuni pingasuni qujamasunneq. Ukrainemiut ukiuni pingasuni sapiitsuliornera. Ukraine tulluusimaarutigaara, Zelenskyj videoliami oqarpoq.