USA nunarsuaq tamakkerlugu coronavirusimut akiuussusiornermi suleqataarusunngitsoq
![](/sites/default/files/styles/image_934x467/public/article_images/20200825-100817-l-1920x1277we.jpg?itok=tBs04dKe)
USA nunarsuaq tamakkerlugu coronavirusimut akiuussusiornermi akiuussutissamillu agguaanermi suleqataanianngilaq.
USA-p præsidentiata illorsuani Det Hvide Husimi oqaaseqartartoq, Judd Deere, marlunngormat taama nalunaaruteqartoq, tuluit nutaarsiassaqartitsiviat The Guardian allappoq.
Akiuussusiornermik suliniummut Covaximut nunarsuaq tamakkerlugu suleqataaffigineqartumut aamma naalagaaffiit peqatigiit peqqinnissakkut suleqatigiiffianni WHO-mi ilaatigut isumaliutigineqartumut USA ilanngunnianngilaq.
AAMMA ATUARUK USA-p amerikamiut covid-19-imut akiuussutissamut akeqanngitsumik neriorsuuteqarfigigai
Coronavirusimut akiuussusiornerup pilertornerunissaa akiuussutissamillu nunarsuarmi tarmami naligiissumik agguaasoqarnissaata qulakkeerneqarnissaa suliuniummi siunertaavoq.
USA-li WHO-mit aninikuunini peqqutigalugu peqataanianngilaq.
- USA-p nunat tamalaat coronavirusip akiorneranut suleqatini suleqatigiinnassavai. Nunarsuarli tamakkerlugu katuffissuarnit peqquserluttuliortartunit WHO-mit Kinamiillu sunnerneqarsimasunit killilersorneqarusunngilagut, Judd Deere, nalunaarpoq.
USA-p WHO Kinamit coronavirusip nunarsuaq tamakkerlugu tuniluutileruttornerani nakkutigisaanerarpaa.
AAMMA ATUARUK USA WHO-mit anivoq, aningaasallu allamut atorniarlugit aalajangerluni
Tamanna USA-p præsidentiata, Donald Trumpip, USA WHO-mi maajimi suleqataajunnaartitsineranik kinguneqarpoq. USA tamanna sioqqullugu nunarsuarmi nunani WHO-mut tapiissuteqartartuni tapiissuteqarnerpaasarpoq.
Nunat coronavirusimut akiuussusiornermi suleqataasut WHO naapertorlugu 172-iusut, nutaarsiassaqartitsivik Reuters allappoq.