USA WHO-mit anivoq, aningaasallu allamut atorniarlugit aalajangerluni
USA Naalagaaffiit Peqatigiit peqqissuunissaq pillugu suleqatigiiffianit WHO-mit anivoq, aningaasallu allamut atorniarlugit aalajangerluni.
USA-mi præsidenti, Donald Trump, tallimanngornermi taama oqarpoq.
Naalagaaffiit Peqatigiit peqqissuunissaq pillugu suleqatigiiffiannut USA aningaasaliinerpaasarpoq, Kinami coronavirusip tuniluutilinnginnerani siusinnerusukkut aarlerisaarisoqarsimannginnerarlugu suliniaqatigiiffik pisuutippaa.
Trumpip isornartorsiuinini sapaatip akunnerata siuliani sakkortusivaa.
WHO-p ullut 30-t ingerlaneranni pitsanngorsaatissaminik iliuuseqanngippat Trumipip ataavartumik WHO-mut aningaasaliisarunnaarniarluni FN-imiillu aninissaminik sioorasaaruteqarpoq.
Sioorasaaruteqarneraniit ullut qulit missaannaat ingerlareersut, WHO-miit anilluni tallimanngornermi nalunaarpoq.
WHO coronavirusimut tunngatillugu kingusinaarluni iliuuseqarneratigut nappaat nunarsuaq tamakkerlugu Trumpip tunillaassuutilernerarpaa.
Unnerluussisut arlallit Trumpip oqaasianut eqqunnginneraallutik BBC-mut oqarput. Taakku oqarnerat naapertorlugu Trumpip nappaatip nunarsuaq tamakkerlugu tunillaassuuttoq naammanngitsumik iliuuseqarfigimmagu WHO pisuutillugu taamatut iliuuseqartoq.
EU-p USA-mut kaammattuutigaa aalajangernini eqqarsaatigilluassagaa.
- Nappaatip nunarsuarmi ulorianartorsiortitsinerani suleqatigiinnissaput ataatsimoorlutalu aalajangeeqatigiinnissarput pingaaruteqarpoq. Isumaqatigiinninniarnernut sunniinnerlussinnaasut sapinngisamik pinngitsoorniarsarissavagut, EU-mi ataatsimiititaliarsuarmi siulittaasoq Ursula von der Leyen, EU-llu nunanut allanut tunngasunut pisortaq Josep Borell ataatsimoorlutik ullumi taama oqariartuuteqarput.