USA-p amerikamiut covid-19-imut akiuussutissamut akeqanngitsumik neriorsuuteqarfigigai

Akiuussutissamik isumannaatsumik atorneqarsinnaasumillu pilersitsisoqarpat innuttaasunut akeqanngitsumik neqeroorutigineqassaaq.

Paul Mango, USA-mi peqqinnissaqarfimmeersoq taama oqarpoq.

Nakorsaammilli nutaamik akuersiniarnermi piumasaqaatit USA-mi qasukkaamineqarnavianngitsut taassuma ilanngullugu oqaatigaa, nakorsaammimmi sukkanerpaamik neqerooruteqarsinnaaniaannarluni taamaaliortoqarnavianngilaq, taanna oqarpoq.

AAMMA ATUARUK WHO-p qullersaa: Coronamut akiuussutissamik iluatsittumik nassaareriaannaasoqanngikkunarpoq

- Piumasaqaatit qasukkarneqarnavianngillat, Mango oqarpoq.

USA-mi naalakkersuisut coronavirusimut akiuussutissamik nassaarniarnermi suliniutinut assigiinngitsunut arfinilinnut katillugit 10 milliardit dollarinik, tassa 63 milliardit koruunit missaannik, aningaasaliinikuupput.

Akiussutissamillu nassaartoqarpat akiuussutissanik 100 millionilikkaanik pilersuisoqarsinnaanissaanut aamma isumaqatigiissusiortoqarpoq.

Akiuussutissat ineriartortinneqarneranni misileraanerit naammassineqareerpata, piumasaqaatillu malinneqareerpata neqerooruteqarsinnaanissaq neriuutaavoq.

Akiuussutissat naalagaaffimmit taava akilerneqassapput. Nakorsat nakorsiartarfiillu, akiuussutissamik innuttaasunut tunniussisartut aningaasaliiffigineqassapput, sillimmasiisarfiit namminersortut naalagaaffiullu sillimmasiisarfii aqqutigalugit pingaarnertut akilerneqassallutik.

AAMMA ATUARUK USA-mi meeqqat 97.000-it coronamik sapaatit akunneri marluk ingerlaneranni tunillatsittut

USA coronavirusimut akiuussutissanik 100 millionilikkaanik aappaagu januaarimi neqerooruteqarsinnaassagunartoq Paul Mangop oqaatigaa.

USA-mi peqqissuseq pillugu misissuisarfiup pisortaata, Francis Collinsip nappaammut akiuussutissamik nassaarsiortunit arfinilinnit ikinnerpaamik ataaseq ukiup naanerani akiuussutissarsinissaanut periarfissaqarluarsoraa.