WHO-p qullersaa: Coronamut akiuussutissamik iluatsittumik nassaareriaannaasoqanngikkunarpoq

Naalagaaffiit Peqatigiit peqqissuunissaq pillugu suleqatigiiffiata covid-19-imut akiuussutissamik ajornaatsumik (silver bullent") nassaanngittoqaratarsinnaanera ataasinngornermi aarlerisaarutigaa.

Tuluttut oqartaaseq "silver bullent" isumaqarpoq ajornartorsiutaasumut qaangeruminaatsumut ajornaatsumik aaqqiissuteqarneq.

- Nakorsaammik tupinnartuliamik suli peqanngilaq, nassaartoqarnissaanullu maannangaaq ilimanaateqarani, WHO-p qullersaa Tedros Adhanom Ghebreyesus, tusagassiortunut video aqqutigalugu katersuutsitsinermi ilaatigut oqarpoq. Nutaarsiassaqartitsivik Ritzau taama allaaserisaqarpoq.

Nunani tamalaani oqartussat inuit peqqissuunissaat pillugu peqqussutinik pingaartitsinissaat taassuma kaammattuutigaa. Tassa inuit sapinngisamik qanillivallaannginnissaat, eqqiluisaarnissaat, innuttaasullu misissorneqarlutillu qanermut assiaquteqarnissaannullu malittarisassiornissaat kaammattuutigalugu.

AAMMA ATUARUK WHO: Coronamik tunillaassuunneq ukiuni qulikkuutaani suli ingerlasinnaavoq.

- Inunnut naalakkersuisunullu nalunaarut erseqqarippoq: Sunik tamanik iliuuseqarneq, Gehbreyesus oqarpoq, nunarsuarmilu ersoqatigiinnissamut anersaartuutinut illersuutit takussutissaalernissaat erseqqissaatigalugu.

Nunani tamalaani nakorsaasiorfippassuit coronavirusimut nakorsaasior niarlutik misileraaleruttorput. Nunarsuaq tamakkerlugu inuit 18,1 millionit missaat coronavirusimik maannamut tunillanneqarsimapput.

Virusimik tunillaassuuttoqarnera nunarsuarmi tamarmi ukiuni nutaanerusuni peqqissutsikkut ajornartorsiortoqarnerani annerpaasoq, WHO-p qullersaata tusagassiortunik katersortitsinermi oqaatigaa. Nunat tamalaat akornanni akornanni akiuussutissamik nassaarniartoqarnera aamma pisimanngisaannarsimavoq.

- Akiuussutissamik nassaarniarnermi misileraanerpassuupput, arlallit misileraanerup naggataata ilaanniipput - neriuutissaqarporlu.

- Tamannali akiuussutissamik pissarsinissatsinnik isumaqanngilaq, kisianni sukkassuseq maannamut anguneqarsimasoq siusinnerusukkut anguneqarsimanngilaq, Ghebreyesus oqarpoq.

Nakorsaammik nassaartoqarnissaanut ulapputtoqaleruttorpoq. Nakorsaasiortut Gilead taakkununnga ilaapput. Taakku nakorsaat Remdesivir misileraatigileruttorpaat. Nakorsaat taanna covid-19-imik tunillatsissimasut ilaannut nakorsaatitut atorneqarsinnaasoq paasineqarpoq.

AAMMA ATUARUK WHO: Coronavirus nunarsuarmi tuniluussimasunit allanit sakkortunerpaavoq

Nappaatip ilungersunarnerata kingunerisaanik oqartussat nakorsaatinik akuersisarnermut ingerlatsisarnermut sukkatsisitsipput. Remdesivir juulip qammataata aallartinnerani EU-Kommissionimit aalajangiisumik akuerineqarpoq.

- Akiuussutissamik iluatsittumik imaluuniit akiuussutissaq qaammatialuinnarni iluaqutaasinnaasumik nassaartoqarnissaa pillugu ernumanartoqarpoq. Nakorsaatinilli misileraanerit naammassitinnagit tamanna naluarput, WHO-p qullersaa oqarpoq.

/ritzau/Reuters