WHO: Coronamik tunillaassuunneq ukiuni qulikkuutaani suli ingerlasinnaavoq.
Naalagaaffiit Peqatigiit peqqissuunissaq pillugu suleqatigiiffiata WHO-p coronamik nunarsuaq tamakkerlugu tunillaassuunneq sivisungaatsiassasoq nalilerpaat.
Taama WHO-p ajornartoornermi ataatsimiititaliaa tallimanngornermi ataatsimeereerluni arfininngornermi tusagassiuutinut nalunaaruteqarpoq.
- Tunillaassuunneq peqqissutsikkut ajornartorsiortitsivoq. Tamanna ataasiarluta ukiut hunnorujukkaarlugit nalaattarparput. Nappalaanersuaq ukiuni qulikkaani arlalinni suli sunniuteqassaaq, WHO-p qullersaa, Tedros Adhanom Ghebreyesus, tallimanngormat ataatsimiinnerminni oqarpoq.
Nunarsuaq tamakkerlugu coronamik tunillaassuunneq januarip 30-ani nunarsuarmi peqqissutsikkut ajalusoortitsisutut nalilerneqarpoq. Taamani inuit 100-nit ikinnerusut tunillatsipput nualluummillu toqquteqartoqarani.
WHO nunarsuaq tamakkerlugu ajalusoortitsisutut nappaammik naliliiguni, qaammatit arfinilikkaarlugit nalilersuillutik ataatsimiittassapput, tallimanngormallu taamaaliorput.
- Nunarpassuit tunillaassuunnerup ajornersaa qaangiussorigaluarpaat, maannali siaruaattooqqilerput. Akerlianilli ilarpassuisa maanna aqutaasumik tunillaassuuneq nakkutigaat, Ghebreyesus oqarpoq.
Suliniaqatigiiffissuulli nunat virusimik akiuiniarnertik ingerlatiinnassagaat erseqqissarpaa.
Nunarsuaq tamakkerlugu tunillatsissimasut maanna 17.7 millionit nalunaarsorneqarsimapput, 700.000-ngajaallu inuunerminnik annaasaqarsimapput.