USA-mut isumaqatiginninniarnerit naammassinngippata Narsarsuup siunissaa aalajangerneqarsinnaanngitsoq

Malene Vahlip Narsarsuarmi naammagittaalliorneq paasilluarpaa.

Atuarfik matuvoq. Hoteli matuvoq. Innuttaasullu amerlanerit illoqarfinnut allanut nuutsiterput.

Kommune Kujallermili borgmesterip Narsarsuarmi qanoq pisoqarnissaanut pilersaarusiupallannissani nalornissutigaa 

- Ajornartorsiut unaavoq, assersuutigalugu illuutit allanut neriorsuutigisinnaannginnatsigit, pissutigalugu qulliunerusunit oqartoqarsinnaammat sakkutooqarfiliornissamut atorneqassasut, Malene Vahl (D) oqarpoq. 

Suleqatigiissitap Narsarsuup mittarfiup matoreernerata kingorna qanoriliorneqarnissaa pillugu ukiuni arfineq pingasuni sulissutigisimasaat aallaqqaataaneerneqassasoq qaammatip siuliani paasineqarpoq. 

Suliap iluamik sulineqarsimannginnera pissutaavoq, borgmesteri oqarpoq. 

Narsarsuarmili innuttaasut USA-p, nunatta Danmarkillu akornanni suleqatigiissitami isumaqatiginninniarnerit erseqqissaassutigineqarnissaat utaqqisariaqarpaat.

Malene Vahlili Narsarsuup matuneqannginnissaa anguniarlugu ilungersorusuppoq. 

Sakkutooqarneq

Narsarsuarmi mittarfiup qulimiguuliinnarnut mittarfinngortinneqarnissaa pilersaarutaasimagaluarpoq sulisulli manna  pisariaqartinneqartut atorlugit mittarfittut ingerlavoq.  

Timmisartunilli mittoqarneq ajorpoq.

- Qulimiguulinnut mittarfinngortinneqarnissaa qangali pilersaarutaagaluarpoq, Donald Trumpimulli Natomullu tunngasunik pisoqarpoq taamaammat mittarfittut suli akuerisaanera attatiinnarneqarpoq, Malene Vahl oqarpoq.  

USA-p nunatsinni sakkutooqarfiusinnaasunik pingasunik misissuinera siornatigut saqqummiunneqarpoq. Ataaseq Narsarsuarmiippoq. Amerikamiut nunaqarfimmik misissuillutik marloriarlutik tikeraareerput. 

Malene Vahlip kommunip pilersaarutai iluatsinngitsoornerarpai, nunaqarfimmi upalungaarsimanermut ikaarnissaq piareersimaffigineqareersimagaluarmat – inuit atortullu nunaqarfiup aamma qulimiguulinnut mittarfiup ingerlanneqarneranut pisariaqartinneqartut. 

- Maannamut taqqamani susoqassanersoq qanorlu (sakkutooqartigissanersoq, aaqq.) pisortatigoortumik saqqummiussisoqanngilaq. Taamaattumik tunngavissaqanngitsumik aalajangiisinnaanngilagut, Malene Vahl oqarpoq. 

USA utaqqineqartoq

Greenland Airports Narsarsuarmi illut amerlanersaannik maannakkorpiaq piginnittuuvoq, nunaqarfiullu pisariaqartitaanik isumaginnittuulluni. Taamaattumik Kommune Kujalliup Greenland Airportsip isumaqatigiissuteqarfiginissaa utaqqivaa.

- Greenland Airportsip danskit naalagaaffiat aamma utaqqivaa, taakkuuppummi mittarfiup qanoq atorneqarnissaanik aalajangiisussat? Taakkua Issittumi tunngaviusumik ilinniarnermut, Issittumi Sakkutooqarfiup, sakkutooqarnikkut allatigut imaluunniit Natomik suleqateqarnermut atorneqassanerpat? Malene Vahl oqarpoq:

- USA-p Kalaallit Nunaanni qanoq sakkutooqartiginissani kissaatigineraa aamma USA, danskit illersornissaqarfiat Natomiluunniit nuna alla suleqatigineqassanersoq suleqatigiissitami matoqqasumi maannakkorpiaq isumaqatigiissutiginiarneqarpoq.

Malene Vahlip Narsarsuup siunissaa pillugu pilersaarusiorneq sakkutooqarnerup tungaatigut qanoq pisoqarnissaanut attuumassuteqarluinnarnera maluginiaqquaa. Inissiat qanoq atorneqarnissaannit kiassarnerullu pilersaarutit naapertorlugit 2027-mi unitsinneqarnissaanut.

- Isumaqatigiissutit taakkua isumaqatiginninniutigineqarnissaannut piffissaqarnissaat ataqqilluinnarpara. Taamaammat uanga nunaqarfik pillugu naammagittaalliornera naapertuutinngilaq, Malene Vahl oqarpoq.

Neriuutaarunneq/pakatsineq naalakkersuisunillu suleqateqarneq 

Malene Vahlip suleqatigiissitaasimasut Narsarsuup siunissaa pillugu isumaqatigiissuteqarsimannginnerat pillugu aamma isornartorsiuivoq. 

- Suleqatigiissitami suleriaaserisimasaq tassaavoq, ataatsimeeqatigiinnerni suliassaqarfiit sumiinnerannik kikkunniilernissaannullu isumaqatigiinniarnerit, Malene Vahl oqarpoq:

- Kommunilli suliassaqarfii Namminersorlutillu Oqartussat akisussaasutut suliassaqarfii pillugit allanngorteqqinneqarsinnaanngitsunik isumaqatigiissuteqartoqarnikuunngilaq.

Borgmesterilli aalajangiisoqannginnera Narsarsuarmi pakatsissutaanera paasisinnaalluarpaa.

- Timmisartoq kingulleq aallarmat nammineq tassaniippunga, aamma killitsingaarpunga. Isaanni takusinnaavara, uanga aamma taakkutulli pakatsigama misiginneqatigaakka, Malene Vahl oqarpoq:

- Naalakkersuisunik suleqateqarneq tamatuma kingorna qujanartumik iluaallannikooqaaq, inuit nalinginnaasut uagutsitut ittut tamaaniinnerat takusinnaagamikku.

Malene Vahlilli Narsarsuarmi inuuinnartoqarsinnaanissaa anguniarlugu tamaviaarnini erseqqissarpaa.

- Innuttaasuusimasumik, naalakkersuisuneersumik Issittumiluunniit Sakkutooqarfimmeersumik oqaloqateqaraangamaluunniit Narsarsuup matuneqannginnissaanut tamaviaarnera oqaatiginiartarpara, Malene Vahl oqarpoq.