USA-mi tusagassiortoq assiliisualu toqutaapput

Toqutaasut tassaapput tusagassiortoq 24-nik ukiulik Alison Parker, assiliisualu 27-nik ukiulik Adam Ward. Taakku Virginiami toqqaannartumik aallakaatitsinerup nalaani aallaasersortoqarnermi toqutaapput. Tuluit nutaarsiassaqartitsiviat Reuters taama allaaserisaqarpoq.

Inuk alla saassussinermi ikilerneqangaatsiartoq USA-mi tusagassiuutit arlallit allaaseraat, saassussisorlu politiinit maanna ujarneqarpoq.

TV-lerisut taakku marluk Smith Mountain Lake-imit toqqaannartumik aallakaatitsinerminni saassunneqarput, Nunatta nalunaaqutaa naapertorlugu ullaaq qulingiluanut qaleriittoq toqutaallutik. Ikilerneqartoq tassaavoq tusagassiortup aallakaatitsinerup nalaani apersugaa.

TV-qarfiup WDBJ7-ip sulisui toqutaasut, tv-qarfiup taassuma Twitterikkut uppernarsarpaa.

Aallaasersortoqarnera tv-kkut toqqaannartumik aallakaatitsinerup nalaani tusaaneqarsinnaavoq. Assiliisoq uppikkunartoq takuneqarsinnaavoq, apersorneqartorlu qimaasoq aamma takuneqarsinnaalluni.

Saassussisoq politiinit suli ujarneqartoq, politiit oqaaseqartitaata tv-qarfissuarmut CNN-imut oqaatigaa.