USA-mi tusagassiorfiit Saudi-Arabiami ataatsimeersuarneq peqataaffigiumanngikkaat
USA-mi niuernermut ministeri Steven Mnuchin, siunnersorti Jared Kushner, amerikamiullu politikerii nuimanerit pingasut nunat tamalaat akornanni aningaasaliisarnermut ataatsimeersuartoqarneranut peqataassapput.
Nutaarsiassaqartitsiviilli, soorlu Fox Network, CNN, CNBC, Bloomberg Media, New York Times, Financial Timesilu peqataassanngitsut, Hollywood Reporter taama allaaserisaqarpoq.
Nunat tamat suliffeqarfissuini pisortat ukioq kingulleq aamma peqataanngillat, tusagassiortoq isornartorsiusartoq Jamal Khashoggi Saudi Arabiamiut konsulateqarfianni Istanbulimi toqutaanerata kingorna.
AAMMA ATUARUK Tusagassiortoq sinniisoqarfimmi toqusimasoq
Saudi-Arabiap toqqissisimanartutut iluanaarfittullu aningaasaaliiffissaanerata eqqartornissaa Saudi Arabiami Riaydimi oktoberip 29-annit 31-ata tungaanut ataatsimeersuarnermi siunertaavoq.
Saudi-Arabiap kunngissaata pissaanillip, Mohammed bin Salmanip Saudi-Arabiap aningaasaqarnera allanngortinniarsaraa, taamaalilluni uuliamit isertitat kisiisa naatsorsuutigineqarunnaassallutik.
Khashoggimi toqusisoqarneranut ”akisussaaffik tamaat” kunngissap tigunikuuaa, toqutsisoqarnissaanulli peqqussuteqarnikuusimannginnerarluni.
CIA-ip Kunngissap nammineerluni toqutsisoqarnissaanik peqqussuteqarsimassasoraa.