USA-mi præsidentip illorsua TikTokikkut siammarterisinnaanerup inerteqqutaalernissaanut tapersiisoq
Videolianik inuit attaveqaqatigiittarfiatigut TikTokikkut siammarterisinnaanerup USA-mi inerteqqutaalersinneqarnissaanut inatsisissatut siunnersuut tapersersorsinnaallugu, USA-mi præsidentip illorsuata ammaffigaa. Videolianik siammarteriffik TikTok Kinamiunit pigineqarpoq.
USA-p isumannaallisaanermut siunnersortaanera Jake Sullivan marlunngornermi taama oqarpoq.
Inatsisissatut siunnersuutip USA-mi inatsisartuni kongresimi piaarnerpaamik suliarineqarnissaa præsidentip illorsuata kaammattuutigaa.
TikTok USA-p isumannaatsuunissaanut ajoqutasinnaasoq præsidentip illorsuata oqaatigaa.
Inuit attaveqaqatigiittarfiata taassuma USA-mi taamaammat inerteqqutaalernissaa pillugu inatsisissatut siunnersuut kongresimi suliarineqalerpoq, akuersissutigineqassappallu USA-p præsidentianit Joe Bidenimit atsiorneqarsinnaassalluni.
TikTok suliffeqarfimmit Bytedancemit, Kinameersumit, pigineqarpoq. TikTokip App-ini aqqutigalugu amerikamiunik alapernaasersortarneranut pasineqarpoq, pasilliutilli TikTokimit ilumuunnginnerarneqarput.
EU-Kommissionimi Det Europæiske Rådimilu sulisut oqarasuaatiminni TikTokeqarsinnaanerat inerteqqutaalissasoq, EU-Kommissionip Det Europæiske Rådillu qanittukkut nalunaarutigaat.
Sulisut sulinerminnut atatillugu oqarasuaatiminni TikTokeqannginissaat EU-Parlamentip taassuma saniatigut aalajangerpaa, soorlu aamma parlamentip mailikkut programmiini, suliffeqarfiullu iluani attaveqaatit TikTokeqaqqusaajunnaarsinneqartut.
