Trump TikTokip inerteqqutaalernissaanut peqqussummik atsiortoq

TikTokip pasilliutit ilumuunnginnerarpai, ingerlatseqatigiiffiillu pisinnaatitaaffii illersorniarlugit Kinap naalakkersuisuisa oqaatigaat.
Kingusinnerpaamik septembarip ulluisa 15-ianni isumaqatigiissusiortoqarsimanissaa Trumpip piumasaraa, taamaanngippat TikTokip App-ia USA-mi inerteqqutaalissasoq sapaatip akunnerata massuma ingerlanerani oqaatigereerpaa. Assi © : Gage Skidmore/Flickr Creative Commons
Allattoq Ritzau
aggustip 08-at 2020 12:24
Nutserisoq Mads Lynge

Videonut App-ip TikTokip USA-p isumannaatsuuneranut ulorianartuuneratut taavaa. USA-p præsidentiata Donald Trumpip TikTokip piginnittuinik ByteDancemik, Kinameersuusunik, niueqateqarnerit tamaasa peqqussutitigut inerteqqutaalersippai.

Peqqussut ullut 45-t qaangiuppata atuutilissaaq. Nutaarsiassaqartitsivik Ritzau taama allaaserisaqarpoq.

USA-p peqqussutaa Kinap isorilluinnaraa, Kinap nunanut allanut tunngasunut Beijingimi ministereqarfiata oqaaseqartitaata oqaatigaa. Ritzau taama allaaserisaqarpoq.

TikTokimik atuisut paasissutissaataannik tillinniarlunilu atuisutut TikTok isornartorsiorneqangaatsiarpoq. Kinami oqartussat paasissutissat tamakku aqqutigalugit atuisunik nakkutilliiniartutut Kinami oqartussat taassuma saniatigut pasineqarput. Ritzau taama allaaserisaqarpoq.

Amerikamiut 80 millioninit amerlanerusut TikTokimik atuisuupput.

TikTokip pasillilliutit ilumuunnginnerarpai:

- Kinami oqartussanit aqunneqarluta paasissutissanik Kinami naalakkersuisunut avitseqatigiinneq ajorpugut, TikTokimik piginnittut oqarput.

TikTokip USA-mi suliai qarasaasialerinermi pingaaruteqartup Microsoftip pisiarissallugit maanna isumaqatigiinniutigileruttorpai.

Kingusinnerpaamik septembarip ulluisa 15-ianni isumaqatigiissusiortoqarsimanissaa Trumpip piumasaraa, taamaanngippat TikTokip App-ia USA-mi inerteqqutaalissasoq sapaatip akunnerata massuma ingerlanerani oqaatigereerpaa.

App-i alla Kinamiunit Tencentimeersunit aamma pigineqartoq WeChat Trumpip peqqussutitigut aamma inerteqqutaalersereerpaa.