USA: Gazami sakkuaakkunnaarallartoqarnissaanut isumaqatigiinniarnerit nanginneqarput

Gazami sakkuaakkunnaarallartoqarnissaa takorusuppara, USA-p præsidentia Joe Biden, tv-kkut apersorneqarnermini oqarpoq. USA-p isertortumik paasiniaasartuisa CIA-meersut qullersaat Kangia Qiterlermiippoq.

Gazami sakkuaakkunnaarallartoqarnissaanut suliaq nanginneqartoq, Israelip isertortumik paasiniaasartui Mossad oqarput, naak muslimit qaammammi iisinnginniarnerisa nalaanni isumaqatigiissusiorsinnaanissaq ilimanarpallaanngikkaluartoq.

Muslimit iisinnginniarnerat ataasinngornermi marsip ulluisa aqqarnani, marlunngornermiluunniit marsip ulluisa aqqaneq-aappaanni aallartissaaq.

- Gazami sorsuttoqarnerani sakkuaakkunnaarallartoqarnissaa takorusuppara, USA-p præsidentia Joe Biden, tv-qarfimmit MSNBC-mit arfininngornermi unnukkut apersorneqarluni oqarpoq.

Isumaqatigiinniarnerit nanginneqartut Bidenip erseqqissaatigaa, isumalluarnerarporlu.

- Sakkuaakkunnaarallartoqarnissaata periarfissaasoq isumaqartuarpunga, taanna oqarpoq.

USA Qatarilu isumaqatigiinniarnertik Egyptenimi nangikkaat taassuma aviisimut Wall Street Journalimut aamma oqaatigaa.

Israelip ministeriunerata Benjamin Netanyahup Israel illersorsinnaasariaqarpaa, sakkuaakkunnaarallarnerli atuutilersinngikkuniuk pissutsit ajalusoortissinnaavai, USA-p præsidentia oqarpoq.

- Sakkuaakkunnaarallarneq tigusarineqarsimasunik, sallunaveeqqutitullu tigummianik paarlaasseqatigiinnermik aallarnerneqarnissaa takorusuppara, Biden nangilluni oqarpoq, sapaatillu akunnerini arfinilinni sakkuaakkunaarallartoqarnissaa siunnersuutigalugu.

Mossadip qullersaa David Barnea, CIA-p qullersaanik William Burnsimik sapaatit akunnerata naalernerani ataatsimeeqateqarpoq, sallunaveeqqutitut tigummiat iperagaanissaat tassani eqqartorneqarluni.

Bidenip oqarnera naapertorlugu Burns Kangia Qiterlermiikkallassaaq.

/ritzau/Reuters